გელა ბელქანია

მეტად მოკლე ბიოგრაფიული ცნობები მოგვეპოვება ამ სიცოცხლით სავსე ლამაზი ჭაბუკისა, რომელიც სრულიად ახალგაზრდა ოცდაორი წლისა დაიღუპა სამშობლოს ერთიანობასა და მთლიანობისათვის გამართულ ბრძოლაში.

გელა ანზორის ძე ბელქანია დაიბადა 1970 წლის 3 მარტს. გალის რაიონის სოფელ ნაბაკევის საშუალო სკოლაში სწავლობდა. ბავშვობიდანვე გამოირჩეოდა სანიმუშო ყოფაქცევითა და კარგი სწავლით, უდიდესი პატივისცემით სარგებლობდა როგორც აღმზრდელ მასწავლებლებში, ისე თანატოლებსა და სოფლის საზოგადოებაში.

სკოლის დამთავრების შემდეგ მუშაობა დაიწყო სიდის ჩაის მეურნეობაში ჩაის მკრეფავად, მანქანა ,,საქართველოს~ მესაჭე გახლდათ. თან დოსააფის სკოლაში სწავლობდა.

1988 წელს გელა სავალდებულო სამხედრო სამსახურში გაიწვიეს, რომელსაც იხდიდა ჩერნიგოვის ოლქის ქალაქ პრილუკში. ძნელი იყო მისთვის შეგუებოდა რუსი სამხედროების მიერ ქართველების მიმართ მკაცრ მოპყრობას, დამცირებას, აბუჩად აგდებას, მაგრამ გელა ძლიერი იყო და თავს არავის დააჩაგვრინებდა. აქაც თავი გამოიჩინა, სამხედრო საქმეს კარგად დაეუფლა, მიღებული ჰქონდა მეთაურის თანამდებობა, სიგელები, სამკერდე ნიშნები, იყო კომკავშირული ყრილობის დელეგატი, მოგეხსენებათ, ასეთი პატივი იოლი მოსაპოვებელი არ იყო.

სამხედრო სავალდებულო სამსახურის მოხდის შემდეგ, გელამ მუშაობა დაიწყო გალის შინაგან საქმეთა განყოფილებაში. იქაც თავი გამოიჩინა, საქმის პირნათლად შესრულებითა და დისციპლინით, რისთვისაც მიღებული ჰქონდა მადლობები. მალევე ნიჭიერ, ბეჯით ახალგაზრდას მისცეს საგზური სწავლა გაეგრძელებინა თბილისის პოლიციის უმაღლეს აკადემიაში.

1992 წელს გელა ბელქანია ამ აკადემიის კურსანტია, როგორც კი სამშობლოს დასჭირდა მისი სამსახური, გელა სხვა კურსანტებთან ერთად მოხალისედ წავიდა აფხაზეთში, სადაც მას მოუხდა ბრძოლა აფხაზ სეპარატისთა წინააღმდეგ.

1992 წლის 28 აგვისტოს გაგრის რაიონის სოფელ კოლხიდასთან მტრის ტყვიამ განგმირა ოცდაორი წლის ჭაბუკის სიცოცხლე. წავიდა ამ ქვეყნიდან სამშობლოს წინაშე ვალმოხდილი ახალგაზრდა და უდიდესი ტკივილი დაუტოვა თავის ახლობლებსა და თანამებრძოლებს, რომელთა გულებში იგი სამარადჟამოდ იცოცხლებს.

მხოლოდ 22 წელი იცოცხლა, მშობლიური მიწის სიყვარულსა და დიდებას შესწირა მომავლის ოცნებები, მომავალი გაზაფხულები და მარადისობას სრულიად ახალგაზრდა, მაგრამ ვალმოხდილი შეუერთდა.