ლევან მაქსიმეს ძე წიწილაშვილი დაიბადა 1914 წელს  სოფელ ლელიანში (ლაგოდეხის რაიონი). 1934 წელს წარჩინებით დაამთავრა აფენის საშუალო სკოლა, როგორც წარჩინებილმა კურსდამთავრებულმა მაშინვე მუშაობა დაიწყო ლელიანის საშუალო სკოლაში ისტორიის მასწავლებლად. 1937 წელს სწავლა განაგრძო თბილისის პუშკინის სახელობის ორწლიან პედაგოგიურ ინსტიტუტში ისტორიის ფაკულტეტზე, რომელიც 1939 წელს დაამთავრა და იმავე წელს დაინიშნა აფენის ახლანდელი მე-2 საჯარო სკოლის დირექტორად და ისტორიის მასწავლებლად.

1940 წელს გაიწვიეს სამხედრო სავალდებულო სამსახურში, სადაც მოუსწრო დიდმა სამამულო ომმა. იგი გმირულად იბძოდა ფაშისტური გერმანიის წინააღმდეგ, რისთვისაც სამშობლომ ორდენებითა და მედლებით დააჯილდოვა. 

ვალმოხდილი პედაგოგი საბრძოლო ჯილდოებით მკერდდამშვენებული დაუბრუნდა თავის ოჯახს და საყვარელ სკოლას, სადაც ისევ დირექტორად გააგრძელა მოღვაწეობა.

პარალელურად დირექტორობისა 1947 წელს ჩააბარა თბილისის სახელმწიფო პედაგოგიურ ინსტიტუტში ისტორიის ფაკულტეტზე, რომელიც დაამთავრა 1953 წელს. მან მოღვაწეობა დაიწყო ძველ ერთსართულიან შენობაში, მის ხელში, 60-იან წლებში, აშენდა ახალი სკოლა, ის რაც დღეს არის. იგი თითქმის ოთხიათეული წელი უცვლელად ხელმძღვანელობდა სკოლას.

თავისი საქმის პროფესიონალი, მონდომებით ასრულებდა საზოგადოებრივ საქმეს. იგი წლების განმავლობაში იყო ილია ჭავჭავაძი სახელობის საზოგადოება “ცოდნის” აფენის ლექტორთა ჯგუფის თავმჯდომარე, ჰქონდა გასვლითი ლექციები საზოგადოებასთან ცნობილი მეცნიერებთან ერთად. სწორედ საზოგადოებისთვის გაწეული საქმისა და სალექციო პროპაგანდისათვის მან  დაიმსახურა ქებისა და საპატიო სიგელები.

საზოგადოებაში სარგებლობდა დიდი ავტორიტეტით. ბუნებით დემოკრატი, ჰუმანური დირექტორი უყვარდა პედკოლექტივს, მოსწავლეთა მშობლებს და თავად მოსწავლეებს. დღესაც არ ივიწყებენ მის ამაგს, მან უამრავი თაობა ღზარდა და დაუვიწყარი ეპოქა შექმნა აფენის მე-2 საჯარო სკოლაში. ამ სიყვარულის დასტურია ის რომ 2023 წლის სექტემბერში მის საყვარელ სკოლაში დიდი პატივისცემით გაიხსნა ლევან წიწილაშვილის სახელობის მუზეუმი.

 მისი მოღვაწეობა თავისი არსით ამ სკოლის ისტორიაცაა, გამოიფინა ამ სკოლაში მოღვაწე თითქმის ყველა ადამიანის ფოტო და თავი მოუყარეს საინტერესო მასალას, რაც მომავალ თაობას ცნობიერების ამაღლებაში დაეხმარება. გახსნას დესწრნენ სტუმრები პარლამენტიდან და რაიონის ხელმძღვანელობა.

შთამომავლებისაგან დაარსდა, წელიწადში ერთხელ, სასწავლო წლის ბოლოს, ლევან წიწილაშვილის სახელობის სტიპენდია გამორჩეული ნიჭისა და უნარების მქონე მოსწავლებისათვის. ასევე ლაგოდეხის მხარეთმცოდნეობის მუზეუმში მე-20 საუკუნის გამოჩენილ საზოგადო მოღვაწეთა დარბაზში გამოიფინა ლ. წიწილაშვილის ფოტოები.

იგი სკოლის დატოვებასთან ერთად, ხუთ დღეში, 1978 წლის 22 დეკემბერს ინფარქტით გარდაიცვალა და დაემშვიდობა სკოლასაც და სიცოცხლესაც, ვერ შეძლო ცხოვრება გაგრძელებინა საყვარელი სკოლის გარეშე, რამაც იმდროინდელი საზოგადოების უდიდესი გულისტკივილი გამოიწვია.

მადლობა ნინო წიწილაშვილს ინფორმაციის მოწოდებისთვის (ლევანის შვილიშვილი ემირის მხრიდან)