გიორგი მარგიევი 1982 – 2008 ლეიტენანტი

2008 წლის 2 მაისს, ერაყში, სამხედრო ოპერაციის დროს დაიღუპა. როგორც ოჯახს შეატყობინეს, გმირულად იბრძოდა და იმ საბედისწერო დღეს თვითნაკეთ ნაღმზე აფეთქდა.ოჯახის წევრებს ახლა უჭირთ იმაზე საუბარი, რა იყო მისი ბოლო ფიქრები. თუმცა, როგორც გვითხრეს, სამხედრო საქმიანობა ძალიან უყვარდა, ბევრს ვარჯიშობდა, სამხედრო კარიერაზე ოცნებობდა, სამხედრო აკადემია დაამთავრა, ვაზიანში მსახურობდა და ერაყში წავიდა. თანაც ზუსტად იცოდა, რომ დაბრუნდებოდა. ასეთი რწმენა ჰქონდა. გიორგი ამბობდა, სამშობლოსთვის ყველაფერი უნდა გავიღოთო და მთავარი ბრძოლა კიდევ წინ გვაქვსო. სხვაგანაც დავჭირდები სამშობლოს და ერაყში გამოცდილებას მივიღებო.

მაგრამ ეს დიდი ოცნება – მთავარ ომში გამარჯვება, ვერ აისრულა. სულ 26 წლის მეოცნებე ბიჭი იყო, ძლიერი და გონიერი. რომ არა ის უბედური შემთხვევა, 10 დღეში საქართველოში მცირე შვებულებით უნდა ჩამოსულიყო.

გიორგის ოჯახი არ ჰყავდა, თუმცა, ერთი გოგო მოსწონდა. დაოჯახებას არ ჩქარობდა – სამხედრო სამსახურის მოხდას ელოდებოდა. მორწმუნე იყო და საქართველოსთვის არამხოლოდ იბრძოდა, ხშირად ლოცულობდა კიდეც.

გამომცემლობა „პრაიმტაიმის“ წიგნი „გმირის“ მიხედვით.