დაბადების ადგილი: ქ. ქუთაისი. 

დაამთავრა თბილისის სახელმწიფო უნივერსიტეტის საბუნებისმეტყველო ფაკულტეტი 1924 წელს.

1924-1927წწ. იყო ამავე უნივერსიტეტის აგრონომიული ფაკულტეტის ცხოველთა კვების კათედრის ქიმიკოს-ასისტენტი; 1930 წელს მიიწვიეს დოცენტად უნივერსიტეტის აგრონომიული ფაკულტეტის ბაზაზე შექმნილ სასოფლო-სამეურნეო ინსტიტუტში, სადაც იგი 1934 წლამდე ბიოქიმიის კურსს კითხულობდა; 1932-1946წწ. პედაგოგიურ და კვლევით მუშაობას ეწეოდა საქართველოს ზოოტექნიკურ-ვეტერინარულ ინსტიტუტში; პარალელურად მიიწვიეს თბილისის სახელმწიფო უნივერსიტეტის ბიოლოგიის ფაკულტეტზე ბიოქიმიის კურსის წასაკითხად და უნივერსიტეტთან არსებული ექსპერიმენტული ბიოლოგიის ინსტიტუტში ბიოქიმიური ლაბორატორიის შესაქმნელად; 1933-1935წწ. თბილისის სახელმწიფო უნივერსიტეტის დოცენტი; 1936 წლიდან პროფესორი; 1938 წლიდან ქიმიურ მეცნიერებათა კანდიდატი; 1939 წლიდან ბიოლოგიურ მეცნიერებათა დოქტორი; 1941 წლიდან საქართველოს მეცნიერებათა აკადემიის ფიზიოლოგიის ინსტიტუტის ბიოქიმიის განყოფილების გამგე; ომის წლებში იყო თბილისის სახელმწიფო უნივერსიტეტის ბიოლოგიის ფაკულტეტის დეკანი; 1943 წელს თავდაცვითი ხასიათის კვლევითი მუშაობის ჩასატარებლად მიავლინეს ქ. სოჭის ჰოსპიტალში; ომის შემდგომ პერიოდში მისი ინტერესი ნერვული და კუნთოვანი სისტემების მეტაბოლიზმზე კონცენტრირდება. მნიშვნელოვანი იყო მისი ნაშრომები ბიოლოგიური მემბრანების ფიზიკურ-ქიმიური თვისებების შესახებ. დიდია მისი ღვაწლი აცეტილქოლინის და ფოსფოლიპიდების ბიოსინთეზის გზების აღმოჩენაში; მეხსიერების ბიოქიმიური ასპექტების შესწავლაში. მის მიერ გამოქვეყნებულია მრავალი მონოგრაფია, სამასზე მეტი ნაშრომი ზოგადი და კერძო ბიოქიმიის, ნეიროქიმიის დარგში, შექმნილია ბიოქიმიის პირველი სახელმძღვანელო ქართულ ენაზე.

• საქართველოს მეცნიერებათა აკადემია, აკადემიკოსი (1955-1984)

• 1961 - საქართველოს მეცნიერებათა დამსახურებული მოღვაწე

• ზოგადი ბიოქიმიის კურსი : სახელმძღვ. სტუდენტებისათვის (ავტორი). - თბილისი, თბილ. უნ-ტის გამ-ბა, 1971. - 389გვ.
• მეხსიერების ბიოქიმიური მექანიზმების შესახებ (ავტორი). - თბილისი, მეცნიერება, 1966. - 79გვ.
• ცოცხალი მატერია და მასში მიმდინარე ქიმიურ გარდაქმნათა დინამიკა (ავტორი). - თბილისი, საქ. სსრ მეცნ. აკად. გამ-ბა, 1954. - 90გვ.
• ბიოქიმიური და ზოოტეხნიკური ქიმიური ანალიზის პრაქტიკუმი (ავტორი). - ტფილისი, საქართველოს ზოოტექნიკურ-ვეტერინალური ინსტიტუტი, 1933. - 111გვ.