მე-2 საარმიო კორპუსი 23-ე ბრიგადა მე-6 ბატალიონი წიგნიდან "საქართველოსთვის"
ჯამბულატ თენგიზის ძე ხორავა დაიბადა 1959 წლის 5 ივნისს გულრიფშის რაიონში. დაამთავრა დრანდის საშუალო სკოლა.მუშაობდა სოხუმის აეროპორტში მძღოლად,შემდეგ კი - ავიატექნიკოსად.
1992 წლის 14 აგვისტოს აფხაზეთში დაწყებულ ომს გვერდი არ აუვლია ჯამბულის ოჯახისთვის.გულანთებული ვაჟკაცი გვერდზე არ გამდგარა ქვეყნის გასაჭირის დროს, იგი იარაღით ხელში დადგა სამშობლოს დამცველთა გვერდით.ჯამბულატი ირიცხებოდა საქართველოს რესპუბლიკის თავდაცვის სამინისტროს მე-2 საარმიო კორპუსის 23-ე მექანიზირებული ბრიგადის მე-6 სატანკო ბატალიონის მე-4 ასეულში 1992 წლის სექტემბრიდან.
აფხაზეთში მიმდინარე საომარი მოქმედებების დროს ჯამბულატმა თავი გამოიჩინა , როგორც საქართველოს ერთიანობისათვის თავდადებულმა მებრძოლმა. აქტიურად მონაწილეობდა ბატალიონის მიერ ჩატარებულ ყველა საბრძოლო ოპერაციაში,პირნათლად ასრულებდა მეთაურის საბრძოლო დავალებებს.მებრძოლებში სარგებლობდა დამსახურებული ავტორიტეტით.
აფხაზეთის დაცემის შემდეგ მან სამსახური შინაგან საქმეთა სამინისტროს აფხაზეთის შსს სპეცდანიშნულების ასეულში განაგრძო. 1997 წლის ივლისში ჯამბულატ ხორავა გმირულად დაიღუპა გულრიფშის რაიონში-ერთ-ერთი საბრძოლო დავალების შესრულებისას.
ჯამბულატ ხორავას დარჩა მეუღლე და ორი ვაჟი.
საქართველოს პრეზიდენტის განკარგულებით სამშობლოს ტერიტორიული მთლიანობისთვის ბრძოლაში გამოჩენილი გმირობის,ვაჟკაცობისა და თავგანწირვისათვის ჯამბულატ ხორავა, სიკვდილის შემდეგ , დაჯილდოვდა ვახტანგ გორგასლის II ხარისხის ორდენით.