თეიმურაზ იარღანაშვილი დაიბადა 1959 წლის 10 იანვარს, ქ. თბილისში.

1976 წელს დაამთავრა თბილისის 132-ე საშუალო სკოლა.

1977-79 წლებში მუშაობდა რუსთავში გაერთიანება „აზოტში“.

1982-87 წლებში სწავლობდა თბილისის სახელმწიფო უნივერსიტეტში.

უნივერსიტეტის დამთავრების შემდეგ 1990 წლის ნოემბრამდე მუშაობდა სახელმწიფო უნივერსიტეტის ცენტრალური საწყობის გამგედ.

1990 წლის სექტემბერ-ოქტომბერში სამაჩაბლოში ოსი ექსტრემისტების გააქტიურებული მოქმედების შემდეგ თემურ იარღანაშვილი სამშობლოს სიყვარულმა წაიყვანა სოფელ ოქონაში, სადაც 1990 წლის ნოემბრიდან 1991 წლის 21 მაისამდე  იბრძოდა და იცავდა მშობლიურ მხარეს.ჯერ კიდევ იანვარში ოსმა  ექსტრემისტებმა დაურბიეს და გადაუწვეს მამაპაპისეული სახლ-კარი.

1991 წლის 21 მაისს თემურ იარღანაშვილი მოკლეს სოფ. კოდაში. თემურის დაღუპვის ეპიზოდი ასე გადმოგვცეს ამ ამბის დამსწრეებმა:

1991 წლის 21 მაისს თემურის მებრძოლი ჯგუფი სოფელ ოქონადან სოფელ კოდაში  ჩავიდა. იმ პერიოდში ხშირი იყო ქართული სოფლების დარბევის ფაქტები. სოფელში მიცვალებული უნდა დაეკრძალათ. დაკრძალვის დროს სოფელში ორი „ბტრ“ შემოვიდა, რომლებშიც რუს ჯარისკაცებთან ერთად ოსი ექსტრემისტებიც ისხდნენ. მათ უნდოდათ მძევლების აყვანა. ქართველებმა წინააღმდეგობა გაუწიეს. „ბტრ“-ებმა უკან დაიხიეს და სოფლიდან გავიდნენ. მაშინ თემურმა და მისმა ძმებმა გადაწყვიტეს სოფელში შემოსასვლელი მეორე გზა გადაეკეტათ, რათა აქედან არ განმეორებულიყო თავდასხმა და ქართველებს ჰქონოდათ საშუალება გაეპატიოსნებინათ მიცვალებული. „ბტრ“-ები მართლაც მეორე გზიდან აპირებდნენ შემოსვლას. ქართველმა მებრძოლებმა წინააღმდეგობა გაუწიეს. თემურს იარაღმა უმტყუნა,მისი ავტომატი მეორე გასროლაზე მწყობრიდან გამოვიდა,თემური ადგილზე მოკლეს,რამდენიმე მეზობელი დაიჭრა.ასე დასრულდა თემურის ხანმოკლე მაგრამ სამშობლოს სიყვარულით აღსავსე სიცოცხლე.