ვლადიმერ ბელიკოვი
ქართული მიწის დაცვას შეეწირა ეს რუსი ვაჟკაცი, იმ მიწის დაცვას, რომელმაც გაზარდა, კაცურკაცობა, სიყვარული და სითბო ასწავლა.
ვლადიმერ ბელიკოვი 1969 წლის 13 ნოემბერს დაიბადა ქ. თბილისში, აქვე დაამთავრა 110-ე საშუალო სკოლა და ქარხანაში დაიწყო ზეინკლად მუშაობა. სიმართლისმოყვარე, პატიოსან, მშრომელ ახალგაზრდას ყველა აფასებდა.
1990-92 წლებში გადიოდა სავალდებულო სამხედრო სამსახურს. დემობილიზაციის შემდეგ იყო „საქსოფლმშენის“ ელექტრშემდუღებელი.
როცა ჩვენს ქვეყანას გაუჭირდა, ვლადიმერი ეროვნულ გვარდიაში გაიწვიეს – 1992 წლის 26 ნოემბრიდან „თეთრი არწივის“ მებრძოლი გახდა.
1993 წლის 18 მარტს ოჩამჩირის რაიონის სოფელ აფხაზურ ათარასთან დაიღუპა საქართველოსათვის თავდადებული ვაჟკაცი.