ზაზა ვარდანაშვილი დაიბადა 1968 წლის 23 ივლისს წითელწყაროს რაიონის სოფელ არხილოსკარში.

სკოლის დამთავრების შემდეგ სწავლა განაგრძო ქ. რუსთავის 104-ე პროფსასწავლებელში. მოიხადა სავალდებულო სამხედრო სამსახური. მუშაობდა რუსთავის ქიმიურ კომბინატში მუშად.

საოცარი ბედისწერა ერგო ცხოვრებაში. დედა ავადმყოფი ჰყავდა, მამა –ომის ინვალიდი. ბიძამ, მამის ძმამ, და ბიცოლამ, ქალბატონმა ზინამ იკისრეს მასზე მზრუნველობა, საკუთარი შვილების გვერდით გაზარდეს. ზინა ბიცოლა შემდეგნაირად ახასიათებს ზაზას: „საოცარი ბავშვი იყო, ზრდილობით აღსავსე, უღალატო, თავის ქვეყანაზე უსაზღვროდ შეყვარებული, კონტროლი არ სჭირდებოდა, ყველაფერს ნამუსიანად ასრულებდა, მე ჩემს შვილებში არ ვარჩევდი.აუხდენელი სიყვარული გაჰყვა ამ ქვეყნიდან. როცა აფხაზეთის ომი დაიწყო,მომეფერა, მაკოცა და მითხრა: „ბიცოლა, შენს ამაგს არასოდეს დავივიწყებ, არ გეწყინოს, მაგრამ მე დღეს ჩემს ქვეყანას ვჭირდები და უნდა წავიდე“, წავიდა და ბატალიონ „ავაზაში“ მოხალისედ ჩაეწერა. მონაწილეობას იღებდა ყველგან, სადაც მისი ბატალიონის ბიჭები იბრძოდნენ, მაგრამ იმ ავადსახსენებელიტამიშის დესანტის დროს, 2 ივლისს მძიმედ დაიჭრა და მიღებული  ჭრილობებისგან გარდაიცვალა.

ზაზა ჩემი შვილი იყო. მოუნელებელი და მოუშუშებელი ჭრილობა დამიტოვა.

მას ყველა უყვარდა, დიდი, ძალიან დიდი გული ჰქონდა, ყველას სიყვარულს იტევდა ჩემი ვაჟკაცი“.

ღმერთმა ნათელი სასუფეველი დაუმკვიდროს 25 წლის გმირს...