ვიტალი ფილიევი დაიბადა 1978 წლის 14 აპრილს გალის რაიონის სოფელ მეორე გუდავაში.მე-9 კლასის მოსწავლე იყო, როცა აფხაზეთის კონფლიქტი დაიწყო. პატარა ვაჟკაცს გულმა საბრძოლოდ გაუწია. თავის უმცროს ძმას, 13 წლის ტიომას გაანდო საიდუმლო: „ყოველ მიზეზ-გარეშე უნდა წავიდე ჩემი მიწა-წყლის დასაცავად“. ძმამ მოუწონა ჩანაფიქრი და მშობლებს გაანდო, ვიტალი გვარდიელობას აპირებსო. მამამ ახედ-დახედა უფროს შვილს და თქვა: „რამხელა გამხდარა ჩემი ვაჟკაცი“, დედამაც თანხმობა მისცა. დიდი გულითა და პატარა ასაკით ჩვენი გმირი გვარდიელის ფორმაში გამოეწყო. პარტიზანულ მოძრაობაში ჩაება და თავიც ბევრჯერ ისახელა.
1993 წლის 4 დეკემბერს სოფელ ბარღებში, მორიგი ოპერაციის შესრულების დროს, აფხაზმა სეპარატისტებმა და დაქირავებულმა ბოევიკებმა 16 წლის ვიტალი სასტიკად აწამეს.
ჩვენს პატარა გმირს სამშობლოს სიყვარული არ აპატიეს გადამთიელებმა.