27 სექტემბერს, სოხუმში, საქართველოს მთლიანობისათვის უთანასწორო ბრძოლაში დაეცა გივი ქარსაულიძე, დივიზია „თბილისელების“ წევრი.იგი დაიბადა 1935 წელს ქ. თბილისში,დაამთავრა თბილისის #14 საშუალო სკოლა, მსახურობდა ყოფილ საბჭოთა არმიაში და ბედის უკუღმართობის გამო,თავისი ქვეყნის ნამდვილმა მამულიშვილმა, მონაწილეობა მიიღო 1956 წელს უნგრეთის ცნობილ მოვლენებში,თავისდაუნებურად იბრძოდა იმათ გვერდით, ვინც დღეს მის სამშობლოს ტერიტორიულ მთლიანობას ეცილება და მათივე ტყვიით განიგმირა.
მას არავითარი სხვა რეგალიები არ ამკობდა, გარდა კარგი და მართალი კაცისა. მუშაობდა ჩუმად და უხმაუროდ.
ასევე ჩუმად, ყოველგვარი ხმაურის გარეშე, როცა სამშობლოს დასჭირდა, ჩადგა მის დამცველთა რიგებში. იგი მესამედ წავიდა აფხაზეთში ხანმოკლე შესვენების შემდეგ და ვეღარ დაუბრუნდა თავის ოჯახს, მეგობრებსა და მის სათაყვანებელ ქალაქს. გივი ქარსაულიძე დააკლდა ქართული ფეხბურთის მრავალრიცხოვან ქომაგთა არმიას. იგი კარგად ახსოვთ ვერისა და მუშტაიდის ბაღის ფეხბურთის „პროფესიონალ“ გულშემატკივრებს.
ასეთი გახლდათ გივი ქარსაულიძე. თავისი ოჯახის წევრებისათვის, ამხანაგებისა და მეგობრებისათვის იგი იყო მაგალითი, თუ როგორ უჩუმრად, ყოველგვარი პომპეზურობის გარეშე უნდა ემსახურო შენს ხალხსა და სამშობლოს. ბევრმა გივის ომში მონაწილეობა მისი დაღუპვის შემდეგ გაიგო.
ფოტო მოგვაწოდა ლევან ჟვანიამ დაბადებულია სოხუმი აფხაზეთი გადაღებულია თბილისში კუკიას სასაფლაო