იგი დაიბადა 07 ივლისი 1967 წელს. წარჩინებით დაამთავრა მე-20 საშუალო სკოლა,შემდეგ პოლიტექნიკური ინსტიტუტი, სამხედრო სამსახური ლვოვში მოიხადა.სამაგალითო ჯარისკაცი იყო და მთავრობის ჯილდოც ჩამოიტანა. მისი სამხედრო სამსახურში ყოფნის დროს მოხდა ჩერნობილის საქვეყნოდ ცნობილი ტრაგედია.გიამ მონაწილეობა მიიღო იქ ჩატარებულ სამუშაოებში. შემდეგ თბილისი. დაოჯახება. ორი ვაჟკაცი შეეძინა და თითქოს ჩვეულებრივად დასრულდებოდა მისი ბიოგრაფია, რომ არა აფხაზეთის ომი...
1992 წლის ნოემბრიდან იგი მსახურობდა ეროვნული გვარდიის სატანკო მექანიზებულ პოლკში ოცეულის მეთაურის თანამდებობაზე. მონაწილეობას იღებდა საქართველოს ტერიტორიული მთლიანობისთვის ბრძოლაში აფხაზეთის რეგიონში. ოცეულის სული და გული იყო. ყველას გმირობისა და ვაჟკაცობის მაგალითს აძლევდა. თავისზე უმცროსებს წინა ხაზზე არ უშვებდა, ეშინოდა, ყველას სიცოცხლეს უფრთხილდებოდა დედისერთა ბიჭი, სახლში კი ორი პატარა ვაჟკაცი უცდიდა, რომლებიც მოუთმენლად გაჰყურებდნენ ჭიშკარს და ელოდნენ...
უფროსი ლეიტენანტი, სადაზვერვო ოცეულის მეთაური გრიგოლ (გია) თენგიზის ძე ყარსიმაშვილი, სოფელ ბესლახუბაში, წინა ხაზზე ყოფნის დროს 1993 წლის 26 თებერვალს გმირულად დაიღუპა და დაღუპვის შემდეგ საქართველოს სახელმწიფო მეთაურის 1993 წლის 31 მაისის ბრძანებულებით დაჯილდოვდა ღირსების ორდენით.
სამშობლოზე მთელი არსებით შეყვარებული კაცი შეეწირა თავის საქართველოს, თავის თბილისს, რომლის მიწამაც ჩაიხუტა და განისვენებს კუკიის საძმო სასაფლაოზე.
ფოტო მოგვაწოდა ლევან თეიმურაზის ძე ჟვანიამ დაბადებულია 1985 წელი გულრიფში აფხაზეთი გადაღებულია თბილისში კუკიას სასაფლაო
