კობა ნარჩემაშვილი (დ. 20 დეკემბერი, 1969, ქუთაისი, საქართველოს სსრ) — საქართველოს შინაგან საქმეთა მინისტრი (1 ნოემბერი, 2001 – 25 ნოემბერი, 2003), პოლიციის გენერალ-ლეიტენანტი. საქართველოს პარლამენტის მე-9 მოწვევის მაჟორიტარი დეპუტატი; თავდაცვისა და უშიშროების კომიტეტის წევრი. 

• დაამთავრა ქუთაისის №2 საშუალო სკოლა;

• 1993 წელს წითელ დიპლომზე დაამთავრა თბილისის ივანე ჯავახიშვილის სახელობის თბილისის სახელმწიფო უნივერსიტეტის იურიდიული ფაკულტეტი, 2003 წელს კი იმავე უნივერსიტეტის ეკონომიკის ფაკულტეტი ფინანსებისა და კრედიტების სპეციალობით; არის სამართალმცოდნე და ფინანსისტი;

• 1993 - 1995 წლებში მუშაობდა წყალტუბოს რაიონის პროკურატურაში ჯერ გამომძიებლად შემდეგ კი უფროს გამომძიებლად;

• 1995 - 1996 წლებში იყო საქართველოს გენერალური პროკურატურის საგამოძიებო ნაწილის განსაკუთრებით მნიშვნელოვან საქმეთა გამომძიებელი;

• 1996 - 1997 წლებში მუშაობდა ეროვნული უშიშროების საბჭოს აპარატის სამართალდამცავ ორგანოებთან ურთიერთობის სამსახურში; იყო პრეზიდენტის მრჩეველი პროკურატურისა და შინაგან საქმეთა სამინისტროს ხაზით;

• 1997 - 1998 წლებში შინაგან საქმეთა სამინისტროში საგამოძიებო დეპარტამენტის თავმჯდომარის მოადგილის თანამდებობას იკავებდა;

• 1998 - 2000 წლებში იყო ეროვნული უშიშროების საბჭოს აპარატის სამართალდამცავ და სასამართლო ორგანოებთან ურთიერთობის სამსახურის უფროსი;

• 2000 წელს დაინიშნა შემოსავლების სამინისტროს საბაჟო დეპარტამენტის თავმჯდომარედ, საიდანაც მალევე შინაგან საქმეთა მინისტრის მოადგილედ დააწინაურეს;

• 2001 - 2003 წლებში იყო საქართველოს შინაგან საქმეთა მინისტრი;

• მინიჭებული აქვს პოლიციის გენერალ-ლეიტენანტის წოდება;

• ფლობს ინგლისურ და რუსულ ენებს;

• ჰყავს მეუღლე და სამი შვილი.