ნინო ზედგენიძე ( 26  თებერვალი 1915) მსახიობი.

დაბადების ადგილი: ქ. ლენინგრადი.

დაამთავრა თბილისის 43-ე საშუალო სკოლა, გრიბოედოვის თეატრთან არსებული სტუდია 1938 წელს.

თეატრალური სტუდიის დამთავრებისთანავე ჩაირიცხა გრიბოედოვის თეატრის დასში, სადაც 1938-1944წწ. 20-ზე მეტი მთავარი როლი შეასრულა. 1945-1946წწ. მარჯანიშვილის სცენაზეა. 1947-1983წწ. მუშაობდა საქართველოს სახელმწიფო ფილარმონიაში მხატვრული კითხვის ოსტატად. მის მიერ შესრულებული როლებიდან აღსანიშნავია: ვერა, ანა ფეოდოროვნა (მ. გორკის "უკანასკნელნი", "ვარვარა"), ანია (ს. ნაიდენოვის "ვანიუშინის შვილები"), პოლინა (ო. ბალზაკის "დედინაცვალი"), ლილოში (შ. დადიანის "ნაპერწკლიდან"), სოფიო (ა. გრიბოედოვის 'ვაი ჭკუისაგან"), მზია (ა. ყაზბეგის "ხევისბერი გოჩა"), გალინა (მ. კაცისა და ა. რეჟეშევსკის "ოლეკო დუნდიჩი"), ლამარა (გ. ქელბაქიანის "შესაფერი ჯილდო"), თამარი (გ. შატბერაშვილის "ფიქრის გორა"), მწყემსი ქალი (ი. ჭავჭავაძის "განდეგილი") და სხვა. საქართველოს სახელმწიფო ფილარმონიაში მოღვაწეობის პერიოდში შეადგინა და მოამზადა რამდენიმე ლიტერატურული პროგრამა: "ნათელი გზა" (ლიტ. კომპოზიცია, შედიოდა ქართული და რუსული პროზისა და პოეზიის ნიმუშები), "საქართველოს ცის ქვეშ", "სიტყვა და სიმღერა მშობლიურ მხარეზე" ლიტ. კომპოზიციაში წარმოდგენილი იყო გ. ლეონიძის, გ. ტაბიძის, ს. ჩიქოვანის, გ. აბაშიძის, ი. ნონეშვილის, ხ. ბერულავას, ა. კალანდაძის და სხვათა ლექსები), "ბესიკი" (ა. ბელიაშვილის ამავე სახელწოდების რომანის მიხედვით), "გაცნობა ქართულ და რუსულ ლიტერატურასთან"(პროგრამა სკოლის მოსწავლეთათვის, წარმოდგენილი იყო ქართველ და რუს მწერალთა პროზისა და პოეზიის ნიმუშები), "სიყვარული და წერილები" (შედგებოდა ქართველ, რუს და დასავლეთ ევროპელ კლასიკოსთა ნაწარმოებებისგან), "დასავლეთი დასავლეთის თვალით" (შედგებოდა იტალიური ნოველების, ო. ჰენრის, ა. მორავიას, რ. ბრედბერის, თ. ბერნასის და სხვათა ნაწარმოებებისაგან), "თეთრი ბაირაღები" (ნ. დუმბაძის ამავე სახელწოდების რომანის მიხედვით). ამ საკონცერტო პროგრამებით იგი გამოდიოდა საქართველოს, საბჭოთა კავშირის სხვადასხვა ქალაქებში, რაიონებსა და სოფლებში. 

გთხოვთ,თუ ვინმეს მეტი ინფორმაცია გაქვთ ამ პიროვნების შესახებ,მოგვაწოდოთ.