იოანე ზარიძე დაიბადა 1861 წელს დეკანოზის ოჯახში. პირველდაწყებითი განათლება ოჯახში, მამის მეთვალყურეობის ქვეშ მიიღო.

   1877–1883 წლებში თბილისის სასულიერო სემინარიაში სწავლობდა. 1885 წელს გორის ეპისკოპოსმა ალექსანდრემ (ოქროპირიძე) დიაკვნად აკურთხა, ცოტა ხნის შემდეგ კი მღვდლად დაასხა ხელი და მაღრაანის მაცხოვრის სახელობის ეკლესიის წინამძღვრად დანიშნა. 1889 წელს ახალსოფლის წმინდა ნინოს სახელობის ეკლესიის წინამძღვრად გადაიყვანეს, ხოლო 1892 წელს ბარისახოს ყოვლადწმინდა ღვთისმშობლის მიძინების სახელობის ეკლესიის წინამძღვრად განამწესეს. ერთი წლის შემდეგ ისევ მაღრაანის მაცხოვრის სახელობის ეკლესიაში დაადგინეს.

    1896 წელს საგვერდულით დაჯილდოვდა. 1898 წელს ალვანის სამრევლო–საეკლესიო სკოლის საღვთო სჯულის მასწავლებლად დაიწყო მუშაობა, სადაც მან ორი წელი დაჰყო და ისევ მაღრაანში დააბრუნეს.

    1904 წელს სკუფია უბოძეს. 1907 წელს ბაბანეურის სამრევლოს წინამძღვრად დაინიშნა.

    1912 წლიდან იყო "ქართველთა შორის წერა–კითხვის გამავრცელებელი საზოგადოების" თელავის განყოფილების ნამდვილი წევრი.

    1913 წელს კამილავკა ებოძა. 

    1917–1919 წლებში ალავერდის წმინდა გიორგის სახელობის საკათედრო ტაძარში მსახურობდა

     მღვდელი იოანე 1919 წელს გარდაიცვალა და დაკრძალულია ალავერდის საკათედრო ტაძრის ეზოში.

• ქართველთა შორის წერა-კითხვის გამავრცელებელი საზოგადოება, საზოგადოების თელავის განყოფილების ნამდვილი წევრი (1912-)

• XVIII- XX საუკუნეში მოღვაწე სასულიერო პირთა ცხოვრება და მოღვაწეობა : ლუარსაბ ტოგონიძე, გიორგი მაჩურიშვილი. - თბილისი, "ალილო", 2012

ზარიძე იოანე (ივანე) 1912 წლის 5 მარტს ქართველთა შორის წერა-კითხვის გამავრცელებელი საზოგადოების მთავარგამგეობას თელავის განყოფილების გამგეობამ გაუგზავნა 1911 წლის ნამდვილ წევრთა სია. განყოფილების წევრები იყვნენ: ილია პავლეს ძე გორდეზიანი, მღვდელი ლევან ვარდიაშვილი, ანა ნიკოლოზის ასული ჭავჭავაძისა, ზაქარია რომანის ძე ჭავჭავაძე, მაქსიმილიანე ზაქარიას ძე ჭავჭავაძე, მღვდელი იოანე (ივანე) ზარიძე და ალექსანდრე თომას ძე თუშმალიშვილი.

ზარიძე იოანე  1915 წელს მღვდელი ქართველთა შორის წერა-კითხვის გამავრცელებელი საზოგადოების თელავის განყოფილების ნამდვილი წევრი იყო. 1917 წელს მღვდელი ქართველთა შორის წერა-კითხვის გამავრცელებელი საზოგადოების თელავის განყოფილების წევრი. 1909 წელს ქართველთა შორის წერა-კითხვის გამავრცელებელი საზოგადოების თელავის განყოფილების ნამდვილი წევრები იყვნენ: ნიკოლოზ ვასილის ძე მთვარელიშვილი, ანასტასია რაფიელის ასული კახიძისა, თამარა ალექსანდრეს ასული აბაშიძისა, ლაზარე ვასილის ძე მურთაზაშვილი, მღვდელი იოანე ზარიძე, ანა იაგორის ასული ჩოლოყაშვილისა და ევგენია სოლომონის ასული ჯორჯაძისა.