ეპიფანე ჯაოშვილი გახლდათ 1917 წლის 17 სექტემბრის პირველი საეკლესიო კრების მდივანი და საკათალიკოსო საბჭოს წევრი.

   1902 წლიდან ჯაოშვილი "ქართველთა შორის წერა-კითხვის გამავრცელებელი საზოგადოები" წევრი გახლდათ, ხოლო 1913 წლიდან ამ საზოგადოების თელავის განყოფილების ნამდვილი წევრი და აქტიურად იყო ჩართული საზოგადოების მუშაობაში.

   1903 წელს იმპერატორ ნიკოლოზ II დედის, მარია ფიოდოროვნას ძალისხმევითა და ეგზარქოსის ბრძანებით თბილისში, ვაკის ტერიტორიაზე დაიწყო წმინდა ანდრია წოდებულის სახელობის სამონასტრო კომპლექსის მშენებლობა, რომელსაც ეპიფანე ჯაოშვილი ხელმძღვანელობდა.

    1908 წელს ტაძრის მშენებლობის დასრულების შემდეგ, სწორედ ეპიფანე ჯაოშვილი დაინიშნა წინამძღვრად.

   1921 წელს, გასაბჭოების შემდეგ საქართველოში დაიწყო სასულიერო პირების დევნა-წამება. რასაკვირველია, რეპრესიები შეეხო ეპიფანე ჯაოშვილსაც, რომელიც ამ დროისათვის თელავის ღვთაების სახელობის ეკლესიის წინამძღვარი გახლდათ. აუტანელი მდგომარეობის მიუხედავად, მძიმედ დაავადებული მოძღვარი, შექმნილ მდგომარეობას არ ეგუებოდა და ღვთის სამსახურს განაგრძობდა.

   1931 წელს ლოგინად ჩავარდნილ მოძღვარს მოწამლული ნემსით მოუსწრაფეს სიცოცხლე. ეპიფანე ჯაოშვილი დაკრძალულია თელავის ძველი სასაფლაოს ეზოში ეკლესიის გვერდით.

• ქართველთა შორის წერა-კითხვის გამავრცელებელი საზოგადოება, საზოგადოების თელავის განყოფილების ნამდვილი წევრი (1913-1915)
• ქართველთა შორის წერა-კითხვის გამავრცელებელი საზოგადოება, საზოგადოების წევრი (1902-)

ქართველთა შორის წერა-კითხვის გამავრცელებელი საზოგადოების 1908 წლის ანგარიშის მიხედვით, ტერეზა ხმიადაშვილი, ნოე ხომერიკი, ილია ხუციშვილი, პეტრე ხუმარაძე, ლუკა ჯავახიშვილი, ალექსანდრე ჯაბადარი, თამარა ჯიჯავაძე, ეპიფანე ჯაოშვილი, ათანასე ჯვარიშეიშვილი, იოსებ ჯანგველაძე ყოველწლიურად იხდიდნენ საწევრო 3 მანეთს.

1911 წლის 10 სექტემბერს ქართველთა შორის წერა-კითხვის გამავრცელებელ საზოგადოების წევრებმა – გიორგი გარსევანის ძე რატიანმა, იაკობ სოლომონის ძე ღულაძემ, ქრისტეფორე III-მ (ქრისტეფორე მურმანის ძე ციცქიშვილმა), ტერეზა დიმიტრის ასულმა ხმიადაშვილმა, სვიმონ თომას ძე ხუნდაძემ, ეგნატე მამუკას ძე ხრამელაშვილმა და ეპიფანე ჯაოშვილმა – საწევრო 3 მანეთი გადაიხადეს.

1915 წელს მღვდელი ეპიფანე ჯაოშვილი ქართველთა შორის წერა-კითხვის გამავრცელებელი საზოგადოების თელავის განყოფილების ნამდვილი წევრი იყო.

1915 წლის 17 თებერვალს ქართველთა შორის წერა-კითხვის გამავრცელებელი საზოგადოების მთავარგამგეობას თელავის განყოფილების გამგეობამ გაუგზავნა ნამდვილ წევრთა სია. დოკუმენტის მიხედვით 1914 წელს თელავის განყოფილების ნამდვილი წევრები იყვნენ: ილია სპირიდონის ძე გოგოლაშვილი, მღვდელი ეპიფანე ჯაოშვილი, ნინო პეტრეს ასული კიკვიძისა და ვახტანგ ქრისტეფორეს ძე ზარაფიშვილი.

1917 წელს მღვდელი ეპიფანე ჯაოშვილი ქართველთა შორის წერა-კითხვის გამავრცელებელი საზოგადოების თელავის განყოფილების წევრი იყო.