გრიგოლაშვილი ბორის არკადის ძე (26 ოქტომბერი 1933-93), გენერალ-მაიორი (1993).  გარდაიცვალა აფხაზეთში 1993 წლის 29 ოქტომბერს დაკრძალულია თბილისში

 საქართველოს ეროვნული გვარდიის მთავარი სამმართველოს ოპერატიული განყოფილების უფროსი, თავდაცვის სამინისტროს 1-ლი საარმიო კორპუსის შტაბის უფროსი, სარდლის 1-ლი მოადგილე, დაჯილდოებულია 3 ორდენით და 14 მედლით, გმირულად დაიღუპა აფხაზეთში. სხვა ინფორმაციით დაიჭრა სენაკში, გარდაიცვალა ქუთაისის საავადმყოფოში.

ბორის არკადის ძე გრიგოლაშვილი (დ. 26 ოქტომბერი, 1933, თბილისი — გ. 29 ოქტომბერი, 1993, ქუთაისი, დაკრძალულია თბილისში) — ქართველი სამხედრო მეთაური, გენერალ-მაიორი (1993).

დაამთავრა თბილისის სამხედრო სასწავლებელი (1956). მსახურობდა საბჭოთა კავშირის შეიარაღებულ ძალებში (1953-1989), ჰქონდა პოლკოვნიკის წოდება (1980), დაჯილდოებულია სსრკ-ის 3 ორდენით და 14 მედლით.

1992 წლიდან იყო ქართულ არმიაში: საქართველოს ეროვნული გვარდიის მთავარი სამმართველოს შტაბის უფროსის პირველი მოადგილე, ოპერატიული სამმართველოს უფროსი, 1993 ივლისიდან — საქართველოს თავდაცვის სამინისტროს I საარმიო კორპუსის შტაბის უფროსი, კორპუსის სარდლის პირველი მოადგილე.

იგი მონაწილეობდა საომარ მოქმედებებში აფხაზეთსა და სამაჩაბლოში (ცხინვალის რეგიონი). ბ. გრიგოლაშვილის ხელმძღვანელობით დაიგეგმა და წარმატებით განხორციელდა მრავალი სამხედრო ოპერაცია. იგი სასიკვდილოდ დაიჭრა და გმირულად დაიღუპა ბრძოლაში აფხაზეთის ომში. „ერისა და სამშობლოს წინაშე განსაკუთრებული დამსახურებისათვის, თავდადებისა და თავგანწირვისათვის, სამშობლოს დაცვისა და ერთიანობისათვის ბრძოლებში გამოჩენილი გმირული თავდადებისა და მამაცობისათვის, უნარიანი ხელმძღვანელობით უზრუნველყოფილი სამხედრო ნაწილებისა და ქვეგანაყოფების წარმატებისათვის, შემუშავებული და განხორციელებული საბრძოლო ოპერაციებისათვის“ გენერალ-მაიორი ბორის გრიგოლაშვილი სიკვდილის შემდეგ დააჯილდოვეს ვახტანგ გორგასლის I ხარისხის ორდენით (1993).

ლიტერატურა

ენციკლოპედია „საქართველო“, ტ. 2, თბ., 2012. — გვ. 150.

დოლიძე ლ., გენერალისიმუსი, მარშლები, გენერლები, ადმირალები — ჩვენი თანამემამულენი 1700-2000, თბ., 2000. — გვ. 111, 176.

დოლიძე ლ., გენერლები საქართველოდან: საქართველოს გენერალიტეტის სამსაუკუნოვანი მატიანე, თბ., 2003. — გვ. 441, 659.