დაბადების ადგილი: ქ. თბილისი.

1916-1917წწ. სწავლობდა მოსკოვის მხატვართა სტუდიაში; დაამთავრა მოსკოვის მხატვრულ-ტექნიკური ინსტიტუტის თეატრალურ-დეკორაციული მხატვრობის განყოფილება 1928 წელს. 

1918 წელს დაბრუნდა საქართველოში და 1922 წლამდე მხატვრად მუშაობდა თბილისის ოპერისა და ბალეტის თეატრში. თამარ თავაძე ავანგარდული ხელოვნების წარმომადგენელია. 1920 წელს მან გააფორმა ბალეტი "კარნავალი", რომელიც დადგა ცნობილმა მოცეკვავემ, ბალეტმაისტერმა, პედაგოგმა, მიხეილ მორდკინმა. ის იმხანად თბილისში იმყოფებოდა თავის საბალეტო დასთან ერთად ("მორდკინის ბალეტი") და დგამდა საბალეტო სპექტაკლებს საოპერო თეატრში. 

1924 წელს თამარ თავაძე მონაწილეობდა მუშათა და ჯარისკაცთა თეატრში ვიქტორ დოლიძის ოპერის "ქეთო და კოტეს" დადგმაში (კოსტიუმების ესკიზები).  1927-1936წწ. მუშაობდა მოსკოვის დიდ თეატრში, თუმცა 1930 წელს მისი ხელმოწერა ჩნდება საქართველოს რევოლუციური მხატვრების ასოციაციის (სარმა) დეკლარაციაზე. შემდეგ იგი თბილისში დაბრუნდა. ოპერისა და ბალეტის თეატრში გააფორმა როსინის ოპერა "სევილიელი დალაქი" (1938); კოტე მარჯანიშვილის თეატრში - მოლიერისა და მარკ-ანტუან შარპანტიეს სამმოქმედებიანი ბალეტ-კომედია "ვითომდა ავადმყოფი" (1943); ბათუმის დრამატულ თეატრში ლევან გოთუას "მეფე ერეკლე" (1944). მას შემდეგ, როგორც ჩანს, თამარ თავაძეს ოპერასა თუ დრამატულ თეატრებში სპექტაკლები აღარ გაუფორმებია. მისი შემოქმედება დღემდე შეუსწავლელია. თეატრის მხატვარი.

წყარო: საქართველოს დემოკრატიული რესპუბლიკა (1918-1921): ენციკლოპედია -ლექსიკონი. -თბ., 2018.-გვ.175