მე-2 საარმიო კორპუსი 23-ე ბრიგადა მე-6 ბატალიონი წიგნიდან "საქართველოსთვის"
გოდერძი ამირანის ძე დუნდუა დაიბადა 1958 წლის 5 ივნისს ქალაქ სამტრედიაში.1975 წელს დამთავრა საშუალო სკოლა და იმავე წელს ჩააბარა საქართველოს სუბტროპიკული მეურნეობის ინსტიტუტში- მექანიზაციის ფაკულტეტზე,რომელიც 1980 წელს დაამთავრა. 1982 წელს სამხედრო-სავალდებულო სამსახურიდან დემობილიზაციის შემდეგ გოდერძი დაბრუნდა სოხუმში და მუშაობა დაიწყო სსმი-ს მექანიზაციის ფაკულტეტის მასალათმცოდნეობისა და მანქანათა რემონტის კათედრაზე ლაბორანტად.შემდეგ გადავიდა ამავე ინსტიტუტის გამოთვლითი ტექნიკის კათედრის უმცროს მეცნიერ-თანამშრომლად, ხოლო 1989 წელს, სამეცნიერო ხარისხის დაცვის შემდეგ უფროს მეცნიერ-თანამშრომლად დაინიშნა და მიენიჭა დოცენტის წოდება. სამეცნიერო მოღვაწეობის დროს გოდერძი დუნდუას აქვს გამოქვეყნებული 30-ზე მეტი სამეცნიერო ნაშრომი , სამთო მიწათმოქმედების დარგში და სასოფლო-სამეურნეო აგრეგატების მდგრადობაზე, არის ათეულობით რაციონალური წინადადებების და 17 გამოგონების ავტორი.
აფხაზეთში საომარი მოქმედებების დაწყებისთანავე, გოდერძი დუნდუა აქტიურად ჩაერთო დაზიანებული საბრძოლო ტექნიკის შეკეთება-აღდგენაში. 1992 წლის სექტემბრიდან ირიცხებოდა საქართველოს რესპუბლიკის თავდაცვის სამინისტროს 23-ე ბრიგადის მე-6 სატანკო ბატალიონის სარემონტო ასეულის ათმეთაურად.
1993 წლის 18 იანვარს, საბრძოლო მოქმედებების დროს სოფელ აჩადარაში , მდინარე გუმისთასთან, გოდერძი დუნდუამ მიიღო სასიკვდილო ჭრილობა. 20 იანვარს სოხუმის რესპუბლიკური საავადმყოფოს ნეიროქირურგიის განყოფილებაში გონზე მოუსვლელად გარდაიცვალა.
გოდერძი დუნდუას დარჩა მეუღლე და სამი შვილი.
საქართველოს პრეზიდენტის განკარგულებით სამშობლოს ტერიტორიული მთლიანობისთვის ბრძოლაში გამოჩენილი გმირობის, ვაჟკაცობისა და თავგანწირვისათვის გოდერძი დუნდუა, სიკვდილის შემდეგ, დაჯილდოვდა ვახტანგ გორგასლის III ხარისხის ორდენით.