კახაბერ ზურაბის ძე კვანტრიშვილი, დაბადებული 1971 წლის 20 დეკემბერს, ზესტაფონის რაიონის სოფელ თვირში, განათლება-საშუალო, უცოლო.
სკოლის დამთავრების შემდეგ მუშაობა დაიწყო რუსთავში, სამშენებლო ტრესტში მუშად.
1992 წლის ნოემბერში მოხალისედ შევიდა 114-ე ბატალიონ „ავაზაში“,იყო მენაღმე.
საქართველოს ტერიტორიული მთლიანობის დასაცავად წავიდა საბრძოლველად აფხაზეთში, იბრძოდა სოფელ ლაბრასთან, სადაც 1993 წლის 1 მარტს მოხდა მტერთან დიდი შეტაკება. კახა მეგობრის გადასარჩენად შევარდა ქარ–ცეცხლში, დაიჭრა, ტყვედ ჩავარდა და დაჭრილი ვაჟკაცი აფხაზმა სეპარატისტებმა უმოწყალოდ აწამეს.
დასაფლავებულია ზესტაფონის რაიონის სოფელ თვირში.
კახაბერ კვანტრიშვილი სიკვდილის შემდეგ დაჯილდოვდა მედლით „მხედრული მამაცობისათვის“,
კახაბერ კვანტრიშვილი
უკანასკნელი 5 წლის მანძილზე,მომრავლდნენ საქართველოში ძაძებში ჩაცმული ქალები,წვერმოშვებული ჭარმაგი მამები,ახალგაზრდები,რომლებიც მრავალტანჯულ ქართულ მიწაზე მკერდზე სურათმიმაგრებულნი დააბიჯებდნენ.
თითქოს მარადიულ სასუფეველში გარდასულნი სულთა აჩრდილნიც ვერ ელევიან სიცოცხლის წყურვილს და პატარა სურათებიდან მოციმციმე თვალებით გვიცქერიან და არის ამ თვალებშიც წუთისოფლისადმი სამდურავი და ერთგვარი ნაღველიც, მაგრამ ამასთანავე სიამაყეც, სიამაყე სამშობლოსათვის თავშეწირულ რაინდთათვის დამახასიათებელი. ერთ-ერთ ასეთ რაინდზე გვსურს რომ გიამბოთ -- კახაბერ ზურაბის ძე კვანტრიშვილზე. კახა 1971 წლის 20 დეკემბერს დაიბადა ზესტაფონის რაიონის სოფელ თვრინში. 1988 წელს დაამთავრა სოფ. ალავერდის საშუალო სკოლა. სკოლის დამთავრებიდან ერთი წლის შემდეგ მუშაობა დაიწყო ქ. რუსთავში #5 საამშენებლო სამმართველოში, ემზადებოდა უმაღლეს სასწავლებელში სწავლის გასაგრძელებლად. 1992 წელს გაიწვიეს სამხედრო სავალდებულო სამსახურში. ქ. რუსთავიდან, შინაგანი ჯარიდან გადადის „ავაზას“ ბატალიონში და აფხაზეთში ომის დაწყებისთანავე ბატალიონთან ერთად საბრძოლველად მიემართება. იბრძოდა ქ. ოჩამჩირეში, გმირულად და თავგანწირულად, არ შეურცხვენია „კაი ყმის“ სახელი. 1993 წლის 1 მარტს უმუხთლა ბედისწერამ. დაიღუპა ერთ-ერთი საბრძოლო ოპერაციის შესრულებისას ოჩამჩირის რაიონის სოფ. ლაბრასთან. შემდეგ დაჯილდოვდა მედლით „მხედრული მამაცობისათვის“.
როგორც ამჩნევთ, მისი ბიოგრაფია ერთი შეხედვით პატარა მოგეჩვენებათ, მაგრამ იგი გრძელდება, გრძელდება მარადისობაში და უკვდავებაში.სამშობლოსათვის თავშეწირულ ვაჟკაცს დავიწყება არ უწერია...
ძმა ივანე კვანტრიშვილი
და ელისო კვანტრიშვილი
მშობლები ახალგაზრდობაში
მამა ზურაბ ივანეს ძე კვანრიშვილი 1939-2019წწ
დედა ირაიდა სილიფორეს ასული მიქაბერიძე დაბ. ქვედა საქართველოს 1946-2021წწ
ითანაშრომლა გიორგი ომარის ძე გაჩეჩილაძემ დაბადებულია 1963 წელს სოფელი თვრინი ზესტაფონი