დაიბადა 1969 წლის 6 მარტს. 1986 წელს დაამთავრა ქ. თბილისის 407-ე საშუალო სკოლა. სკოლის დამთავრების შემდეგ მუშაობდა თბილისის მე-8 საავადმყოფოში.

1987 წელს გაიწვიეს სავალდებულო სამხედრო სამსახურში. სამხედრო მოვალეობის მოხდის შემდეგ 1989 წელს შედის ავღანელთა კავშირში. 1991 წელს მუშაობას იწყებს კერძო დეტექტივად თბილისში. ამავე წელს შექმნა ოჯახი.

1992 წელს შევიდა სამგორის რაიონის მე-8 პოლკის ეროვნულ არმიაში.

აფხაზეთში მიმდინარე მოვლენებთან დაკავშირებით შეიქმნა საზოგადოება „თბილისელი“, რომლის წევრიც გახდა გელა და აქედან გაიწვიეს 1992 წლის 4 დეკემბერს საქართველოს ერთიანობის დასაცავად. 

ბრძოლაში ჩაება ოჩამჩირის რაიონში. საბრძოლო ოპერაციების დროს გელა სამედიცინო დახმარებასაც უწევდა მებრძოლებს. მას მეტსახელად „მგელკაცა“ შეარქვეს,  ცხენისწყალთან მომხდარი ერთ-ერთი შეტაკების დროს ბრძოლის ველიდან გამოიყვანა ორი დაჭრილი, მესამედ შებრუნებული გელა დაეცა მტრის ტყვიით განგმირული. 10 დღის შემდეგ მისი გვამი მიიღეს აფხაზი ტყვეების სანაცვლოდ.

გელა მინდიკაურის ხსოვნა სამარადჟამოდ დარჩება მისი ნათესავებისა და ახლობლების, მისი მეუღლის თამილა ჭინჭირაულის გულში.

გელა მინდიკაური სიკვდილის შემდეგ დაჯილდოვდა ვახტანგ გორგასლის III ხარისხის ორდენით.