რობერტ სანიკიძე უკვე ხუთი წელია, ჩვენს შორის აღარ არის რობერტ სანიკიძე. 1993 წლის 16 მარტს, დილის 6 საათზე, სოხუმზე დიდი შემოტევის დროს, გმირულად დაეცა ქალაქის მისადგომებთან, მდინარე გუმისთასთან. სოხუმის მკვიდრი, აფხაზეთის ომის დაწყების დღიდან ჩადგა ტერიტორიული მთლიანობისათვის დამცველთა რიგებში და სისხლის უკანასკნელ წვეთამდე იცავდა თავის ქალაქს მომხდურთაგან. სოხუმის 23-ე ბრიგადის წარდგინებით სახელმწიფო მეთაურის ბრძანებულების საფუძველზე, სიკვდილის შემდეგ დაჯილდოვდა მედლით „მხედრული მამაცობისათვის“
„კაცი, რომელიც დააკლდა ქალაქს“ – ასეთი სათაურით დაიბეჭდა ვრცელი წერილი რობერტ სანიკიძეზე გაზეთ „აფხაზეთის ხმაში“ 1993 წელს. იგი მართლაც დააკლდა თავის ქალაქს, ყველას, ახლობლებს, ოჯახს, დააკლდა თავისი თბილი გულით, ვაჟკაცური ბუნებით, ამიტომაც უყვარდათ, როგორც საქართველოს სუბტროპიკული მეურნეობის ინსტიტუტში, რომლის ასპირანტი იყო ომამდე, ასევე თანამებრძოლებს 23-ე ბრიგადის მე-3 ბატალიონიდან.
