ავდიდო ლარვენტის ძე ბენდელიანი დაიბადა 1955 წელს სოხუმის რაიონის სოფელ ზემო კელასურში.
დაამთავრა ლეკუხონის რვაწლიანი და კელასურის ბ. შელიას სახელობის საშუალო სკოლა. მოიხადა სამხედრო-სავალდებულო სამსახური. დაუბრუნდა ოჯახს, ჩაება შრომის ფერხულში. 1978 წელს ავდიდო დაოჯახდა, ოთხ შვილს უზრდიდნენ ქვეყანას, შეხაროდნენ სიცოცხლეს, მაგრამ აფხაზეთში დენთის სუნი დატრიალდა და კელასურლები ერთ-ერთი პირველები დადგნენ მშობლიური კუთხის დასაცავად. ავდიდო ბენდელიანი ოცმეთაური იყო, ჩვენს გმირ ბიჭებთან ერთად იბრძოდა უშიშრად, თავგანწირვით. ირიცხებოდა საქართველოს რესპუბლიკის თავდაცვის სამინისტროს მე-2 საარმიო კორპუსის 23-ე მექანიზირებული ბრიგადის მე-2 მოტომსროლელთა ბატალიონში.
ავდიდო ბენდელიანი 1993 წლის 19 სექტემბერს სოფელ ოდიშთან გმირულად დაიღუპა. დაკრძალულია სოფელ ზემო კელასურში.