თემურ ჩხარტიშვილი დაიბადა 1962 წელს .ქ. თბილისში.1978 წელს თემურმა დაამთავრა თბილისის 51-ე საშუალო სკოლა,
პარალელურად სწავლობდა აეროკლუბში, საიდანაც 1979 წ. მიიღო მცირე ავიაციის „უ“-2-ის“ ტიპის თვითმფრინავის მართვის უფლება.
1980-82 წწ. სავალდებულო სამხედრო სამსახური გერმანიაში მოიხადა. დემობილიზაციის შემდეგ სწავლა განაგრძო ხარკოვის სამხედრო სასწავლებელში, რომელიც დაამთავრა 1986 წ. მფრინავ-ინსტრუქტორის სპეციალობით და მიენიჭა ლეიტენანტის
წოდება. ამავე სასწავლებელში მსახურობდა მფრინავ-ინსტრუქტორად.
1989 წლიდან თბილისის აეროკლუბის მფრინავ-ინსტრუქტორია და ამავე კლუბის უფროსის მოადგილე. 1991 წ. თბილისის სამოქალაქო ფლოტის „ორბის“ IV ესკადრილიის „ტუ-14“-ის ტიპის ლაინერის შტურმანია.
თემურს ნაცნობ-მეგობრები ახასიათებენ, როგორც კეთილშობილ,კეთილსინდისიერ, სიმართლისმოყვარულ, ოჯახსა და სამშობლოზე უსაზღვროდ შეყვარებულ ადამიანს. აკი გამოამჟღავნა და დაამტკიცა საქვეყნოდ ეს თვისებები,როცა მის საყვარელ საქართველოს გაუჭირდა, უყოყმანოდ ჩაირიცხა ბატალიონ „თბილისელში“ მოხალისედ. თემური ხომ კადრის ოფიცერი იყო, აქ მზვერავობა
იკისრა და უტყუარი ცნობები მოჰქონდა. მის გამჭრიახობაზე მტრის ბანაკში ლეგენდები დადიოდა. მაგრამ, საუბედუროდ, 1992 წლის 7 დეკემბერს ოჩამჩირის რაიონის სოფ. ცხენისწყალთან ერთ-ერთი საბრძოლო ოპერაციის დროს მტერმა მოახერხა მისი უმოწყალოდ დაცხრილვა, საკონტროლო ტყვიაც მიარტყეს თავში.სხვა მიცვალებულებთან ერთად გამოიტანეს თემურიც, მაგრამ აღმოჩნდა, რომ
ცოცხალი იყო, ფიზიკურად ძლიერი ვაჟკაცი 1995 წლის 9 ოქტომბრამდე ებრძოდა სიკვდილს.
ნატანჯი თემური მუხათგვერდის სასაფლაოს მიაბარეს ახლობლებმა და ოჯახის წევრებმა.
არ შეიძლება საქართველომ დაივიწყოს თემურ ჩხარტიშვილი და მასავით გულანთებული ადამიანები, რომლებიც ჩვენს დღევანდელ და ხვალინდელ კეთილდღეობას შეეწირნენ.
მადლობა ქალბატონ მზიას ასეთი ვაჟკაცი შვილის აღზრდისთვის.
თემურ ანტონის ძე ჩხარტიშვილი სიკვდილის შემდეგ დაჯილდოვდა ვახტანგ გორგასლის II ხარისხის ორდენით.