იოანე შიუკაშვილი XIX საუკუნის 80-იანი წლებიდან იყო პატარა კახის კარის ეკლესიის დეკანოზი, სადაც XX საუკუნის 20-იან წლებამდე იღვაწა. მის ოჯახში სხადასხვა დროს სტუმრად ყოფილან ცნობილი და სახელოვანი ქართველი მამულიშვილები: ილია, აკაკი, ვაჟა, ალექსანდრე ყაზბეგი, ვასილ ბარნოვი, ანტონ ფურცელაძე, ეკატერინე გაბაშვილი და სხვ. იოანე შიუკაშვილს ურთიერთობა ჰქონდა ექვთიმე თაყაიშვილთან, მის მიერ 1916 წლის 26 მარტს დაწერილი წერილი ინახება დიდი მეცნიერის არქივში, მიმოწერა ჰქონია აგრეთვე მოსე ჯანაშვილთანაც (ხელნაწერთა ინსტიტუტი, №1458; ლიტერატურის მუზეუმი, №21695). 1890 წელს თელავში, მის მიერ დიმიტრი ბაქრაძის პანაშვიდზე წარმოთქმული სიტყვა გამოქვეყნდა გაზეთ "ივერიის" 1890 წლის №42. 1897 წელს იოანე შიუკაშვილს ცნობილი მჭერმეტყველური სიტყვა წარმოუთქვამს ნიკოლოზ ზაქარიას ძე ჭავჭავაძის ცხედრის გამოსვენებისას. მის მეუღლეს, ანა აბრამიშვილს დედის (ჩერქეზიშვილების) ოჯახიდან ჰქონია მდიდარი ბიბლიოთეკა, მათი ოჯახის უმთავრესი ინტერესის საგანი იყო ქართული ენა და ლიტერატურა, თეატრი, მუსიკა. დრამატურგ ნიკო შიუკაშვილის მამა.  

წყარო: კახეთის გამოჩენილი ადამიანები/ოთარ ნაცარაშვილი.-თბ.,2001.-გვ.179

• ქართველთა შორის წერა-კითხვის გამავრცელებელი საზოგადოების თელავის განყოფილება, ნამდვილი წევრი (1914-)
• ქართველთა შორის წერა-კითხვის გამავრცელებელი საზოგადოების თელავის განყოფილების სარევიზიო კომისია, წევრი (1916-)

1877 წლის 10 იანვარს თელავის სამღვდელოების ყრილობამ სასწავლებლის მმართველობის წევრებად აირჩია სოლომონ ფირანოვი და იოანე შიუკაშვილი, ხოლო მათ კანდიდატებად ი. ლაშხაუროვი და გიორგი მრევლიშვილი.

1886 წლის 19 იანვარს ილია ჭავჭავაძემ ივანე ხატიაშვილისგან მიიღო წერილი, რომელშიც საუბარი იყო „ივერიაში“ ქართული ენის მართლწერის საკითხებთან დაკავშირებით დაბეჭდილ ალექსანდრე მირიანაშვილის სტატიაზე.

1889 წელს მღვდელმა იოანე შიუკაშვილმა თელავის სატუსაღოს წიგნსაცავს წიგნები შესწირა.

1889 წლის 9 მარტის გაზეთ „ივერიაში“ მიხეილ ხელაევმა თელავის სატუსაღოს წიგნსაცავისთვის წიგნების შეწირვისთვის მადლობა გადაუხადა ნიკო ჩოლოყაშვილს, იოანე შიუკაშვილს, ვასილ კიკნაძესა და სოსიკო მაჭავარიანს.