მზია არაბული (15 ივნისი 1954 65 წლის) მსახიობი.დაბადების ადგილი: ქ.თბილისი.

არაბულები — ხევსურული წარმოშობის გვარი. გვარი „არაბული“ კაცის სახელი „არაბასაგან“ მოდის. გადმოცემით ასე რქმევია ხევსურეთის სოფელ გუდანის მოსახლის ერთ-ერთ შვილს. მის ჩამომავლებს ეწოდებოდათ: არაბაური-არაბაული-არაბული.მათ ადრე უცხოვრიათ ხევსურეთის არაგვის სათავეებთან — ზეისტეჩოს, წინხადუს, ბაცალიგოს და სხვა სოფლებში. ამ გვარის უძველეს განაყრებად იხსენიებიან: ველგუჯა, რკინა, ბიჩინაგა და ჩუჩაყი, რომელთა შემდგომ მოდგმამ ცალ-ცალკე ქვეგვარი (ფრატრია) წარმოშვა. ისინი ახალ-ახალ ადგილებს იკავებდნენ ჯერ ხევსურეთის არაგვის ხეობაში, შემდეგ კი XVII-XVIII საუკუნეებში ხევის, გუდამაყრის, ერწო-თიანეთისა და ახმეტის ტერიტორიებზე. XIX-XX საუკუნეებში დასახლდნენ, აგრეთვე საგარეჯოს, თელავისა და დედოფლისწყაროს რაიონებში.

დაამთავრა შოთა რუსთაველის სახელობის თეატრალური ინსტიტუტის სამსახიობო ფაკულტეტი (მ. თუმანიშვილის სახელოსნო) 1975 წელს.

კინომსახიობთა თეატრის მსახიობი. მონაწილეობს ფილმებში: "ესკულაპეს მოწაფე" (ო. აბესაძე, 1977); "დაუვიწყარი დღე" (თ. მაღალაშვილი, 1977); "წინაპართა მიწა" (გ. ლორთქიფანიძე, გ. ჭოხონელიძე, 1979); "ზღაპარი" (კ. სურმავა, 1980); "მოხუცი მემანქანე" (თ. გოშაძე, 1981); "სიბრძნის კარავი" (ო. კობერიძე, 1982); "ამბავი სურამის ციხისა" (ს. ფარაჯანოვი, დ. აბაშიძე, 1984); "ადამიანთა სევდა" (გ. ჩოხელი, 1984); "ზოგი ჭირი მარგებელია" (პ. ჩარკვიანი, 1984); "ხარება და გოგია" (გ. შენგელაია, 1987); "ვამეხი და გოგია" (ო. ლითანიშვილი, ო. შამათავა, 1987); "ცხოვრება დონ კიხოტისა და სანჩესი" (რ. ჩხეიძე, 1989) და სხვ. მთავარი როლი შეასრულა ფილმში "ლოლიტა" (რ. გორგობიანი, 1991).