მალხაზ დათაშვილი დაიბადა 1968 წლის 28 მაისს ცხინვალის რაიონის სოფელ თამარაშენში.

8-წლიანი სკოლის დამთავრების შემდეგ სწავლა განაგრძო ცხინვალის მე4 საშუალო სკოლაში, სადაც კარგი სწავლითა და სანიმუშო ყოფაქცევით გამოირჩეოდა. მეგობრებს გვერდით ედგა ჭირშიც და ლხინშიც. მუშაობდა თამარაშენის მებოცვრეობის მეურნეობაში. პირნათლად მოიხადა სავალდებულო სამხედრო სამსახური, საიდანაც სერჟანტის წოდებით და მადლობებითა და სიგელებით ხელდამშვენებული დაბრუნდა. სწავლა განაგრძო მოსკოვის ფილიალის მილიციის უმაღლეს სკოლაში, რომელიც ლეიტენანტის წოდებით დაამთავრა. აქტიურად მონაწილეობდა სამაჩაბლოსა და აფხაზეთში ტერიტორიული მთლიანობის დაცვისთვის წარმოებულ ბრძოლებში.

1991 წლის 11 აპრილს მალხაზი და რამდენიმე თამარაშენელი დააკავეს. 22 დღე სასტიკად აწამეს ოსმა ექსტრემისტებმა უდანაშაულო ქართველები.

1993 წლის 4 დეკემბერს თამარაშენელმა ქართველებმა მოკლეს 4 ოსი (იმ დროს მალხაზი იქ არ იმყოფებოდა). მდგომარეობის განმუხტვის მიზნით მან გადაწყვიტა, დამნაშავენი გორის მილიციისთვის ჩაებარებინა. 9 დეკემბერს მას თავს დაესხნენ ოსი ექსტრემისტები და სასტიკი წამებით გამოასალმეს სიცოცხლეს 4 ქართველი, მათ შორის მალხაზ დათაშვილიც. იმავე დროს ოსებმა ნაღმზე ააფეთქეს მისი უფროსი ძმა თამაზ დათაშვილი, რომელიც გადარჩა,მაგრამ სამწუხაროდ I ჯგუფის ინვალიდია.

სამშობლოსთვის ანთებული მალხაზის გული სამუდამოდ დადუმდა.