გურამ კონტუაძე

საქართველო იყო მისი საოცნებო სახელი

ის ხუთი წელი იყო საწოლს მიჯაჭვული.თავს ევლებოდა საყვარელი მეუღლე ლარისა ჯელაძე, შვილები – გულივერი,თეა და გურამი,სანათესაო და სამეგობრო.მაგრამ ვერაგია სიკვდილი, 1998 წლის 17 დეკმბერს ჩაუსაფრდა და სიცოცხლეს გამოასალმა; ზუსტად ექვსი თვის შემდეგ კი საქართველოს პრეზიდენტის განკარგულებით გურამ კონტუაძე დაჯილდოვდა ვახტანგ გორგასლის ! ხარისხის ორდენით. სიცოცხლემ დაამარცხა სიკვდილი. მაღალი საბრძოლო ჯილდო სამშობლოს ტერიტორიული მთლიანობისათვის შეწირულს ისე გადაეცა, როგორც ცოცხალს. მწუხარებასთან ერთად სიხარულიც დიდი იყო.

ბურამ კონტუაძე მარტვილიდან, კერძოდ ბანძიდან იყო. სამხედრო სასწავლებლიდან დემობილიზაციით აფხაზეთის სატრანსპორტო პოლიციაში სისხლის სამძებროს უფროს ინსპექტორად მუშაობდა.

აფხაზეთში პირველი ტქვია გავარდა თუ არა, პოლიციის ზემდეგი გურამ კონტუაძე ცეცხლის წინახაზზე გაჩნდა.

მცირე დოსიეში საბრძოლო მოკვლევიდან, რომელსაც ხელს აწერს ყოფილი შინაგან საქმეთა სატრანსპორტო პოლიციის სამმართველოს უფროსი, ამჟამად სატრანსპორტო პოლიციის დეპარტამენტის კრიმინალური სამმართველოს უფროსი, პოლიციის პოლკოვნიკი ა. ცაავა, ვკითხულოთ:

– ზემდეგი გურამ კონტუაძე აქტიურ მონაწილეობას ღებულობდა აფხაზეთის სატრანსპორტო პოლიციის სამმართველოს მიერ ჩატარებულ ყველა საბრძოლო ოპერაციაში – გუმისთის, ტამიშის, შრომა-კამანის მიმართულებით გმირული მაგალითებითაც არაერთხელ გამოიჩინა თავი სამშობლოს ერთგულმა პატრიოტმა.

საბრძოლო ოპერაციებში, რომელშიც გურამ კონტუაძე მონაწილეობდა,არაერთხელ იქნა მიღწეული წარმატებანი. მტერი მოგერიებული და განადგურებული იქნა – რკინიგზის ხაზი დივერსიას გადაურჩა.

– ერთ-ერთი ოპერაციის დროს, კერძოდ 1993 წლის 24 სექტემბერს, როცა აფსუა სეპარატისტები და მათი დაქირავებული ჯარები მოადგნენ უიარაღოდ გადარჩენილ სოხუმის მოსახლეობას, ზემდეგი გურამ კონტუაძე თავის თანამებრძოლებთან ერთად თავდადებით ეკვეთა მტრის ჭარბ ძალებს. სოხუმში, ბარათაშვილის ქუჩის მიმდებარე ტერიტორიაზე შემოჭრილ მოწინააღმდეგე ბოევიკებს გმირულად შეება.

და აი აქ, სწორედ აქ, სოხუმის ცენტრში, მტრის მიერ ნასროლი ტქვია ხერხემალში მოხვდა. მძიმედ დაჭრილი თანამებრძოლებს ამხნევებდა, უკან არ დაიხიოთ, არ დატოვოთ სოხუმი. სოხუმი კი ცეცხლის ალში უკვე ეხვეოდა,დაჭრილის ევაკუაცია როგორღაც მოხერხდა და თბილისში გადმოაფრინეს. აქ რამდენიმე უმძიმესი ოპერაცია გაუკეთეს. მაგრამ საწოლს ვერ მოაცილეს.

სამკუნალოდ საზღვარგარეთაც კი გაგზავნეს, მაგრამ ამაოდ... ხერხემლის დაზიანებამ თავისი გაიტანა.