მონაზონი სიდონია
მონაზონი სიდონია (კალანდია)
1972 წლის 28 თებერვალს დაიბადა ქ. გალში. 1989 წელს დაამთავრა გალის რაიონის სოფ. ჭუბურხინჯის საშუალო სკოლა.
1999-2004 წლებში სწავლობდა და დაამთავრა სულხან-საბა ორბელიანის სახელობის საბანკო კოლეჯი, ბუღალტერ-ეკონომისტის სპეციალობით.
1998 წელს მოინათლა ქ. ზუგდიდის კვირაცხოვლობის ტაძარში.
2008 წლის მაისიდან ზუგდიდის რაიონის სოფ. კორცხელის ივერიის ღმრთისმშობლის დედათა მონასტერში იმყოფებოდა, სადაც 2009 წელს აკურთხეს
მორჩილად. 2011 წლიდან გადაიყვანეს სოფ. ოჭანეს წმ. ნინოს დედათა მონასტერში.
2013 წლის 26 აპრილს მონაზვნად აღკვეცეს წმ. სიდონიას სახელით.
2018 წლიდან იმყოფებოდა სოფ. მახარიის თამარ მეფის დედათა მონასტერში, ხოლო 2019 წლიდან გადაიყვანეს სოფ. კორცხელის ივერიის ღმრთისმშობლის დედათა მონასტერში,
სადაც ცხოვრობდა და იმსახურა სიცოცხლის ბოლო დღემდე.
სულ რამდენიმე თვეა, რაც ყველასათვის ძვირფასმა დედა სიდონიამ იმიერ სამყაროში გადაინაცვალა. მან 50 წლის ასაკამდე ღირსეულად ატარა თავისი ტკბილი ჯვარი და
მიიცვალა 2022 წლის 2 მარტს. ჩემი და დედა სიდონიას ურთიერთობა მაშინ დაიწყო, როცა იგი სოფ. მახარიის თამარ მეფის დედათა მონასტერში მსახურობდა.
პირველი, რითაც დამამახსოვრდა, არის მისი კეთილსინდისიერება და უბრალოება. დედაოს სულიერი თავგანწირვა სამაგალითო იყო ჩემთვის, მისი დარიგეგები კი სანთელივით მინათებდა გზას.
გულის სიღრმეში მაქვს ჩაღვენთილი მისი სიტყვები, – მე სულ მახსოვხარ, ჩემს ლოცვებში მყავხარო. – ამ სიტყვებით
გვ290
მუდამ მადლიერი და დაიმედებული ვიყავი, რადგან მეგულობდა ჩემი უბადრუკი სულისთვის მლოცველი ადამიანი,
რომლის მადლმოსილი მოხსენიებაც გულზე სალბუნად მეფინებოდა. ამავდროულად კი სიბრაზე მერეოდა, რადგან
წუთისოფლის საზრუნავში ჩაფლული ხშირად ვერ მივდიოდი მასთან. შემინდოს უფალმა.
ძალინ მიმძიმს და მტკივა, რომ წარსულში მიწევს დედაოზე საუბარი. თუმცა როგორც უწმინდესი ბრძანებს: „სიკვდილი
ხომ გარდაუვალი რეალობაა, იგი ახალი სიცოცხლის დასაწყისია და ღმერთთან შეხვედრის საწინდარი. მტკივნეულია ახლობლებთან განშორება,
მაგრამ ცრემლებისა და მწუხარების მიღმა უნდა დავინახოთ ნათელი დაუღამებელი, რომლითაც მოცულია განსვენებულის სული. უნდა დავინახოთ ქრისტეს
მიერ სიკვდილის ძლევა“.
უფალმა სავანესა მართალთასა დააწესოს მისი უკვდავი სული.
გვანცა კაკულია
