მე-2 საარმიო კორპუსი 23-ე ბრიგადა მე-6 ბატალიონი წიგნიდან "საქართველოსთვის"
ამირან ქიშვარდის ძე ხურცილავა დაიბადა 1956 წლის 9 მარტს მარტვილის რაიონის სოფელ სალხინოში. სკოლის დამთავრების შემდეგ მსახურობდა საბჭოთა არმიის რიგებში. სამხედრო-სავალდებულო სამსახურის მოხდის შემდეგ დაამთავრა ქალაქ სოხუმის ინდუსტრიული ტექნიკუმი და მუშაობა დაიწყო სოხუმის სამშენებლო კომბინატში. 1978 წელს ამირანი დაქორწინდა,შეეძინათ სამი შვილი (მურთაზი,მანონი და ნიკა). ოჯახი ბედნიერად ცხოვრობდა ზღვისპირა სოხუმში და სამომავლო გეგმებს ალაგებდა,მაგრამ 1992 წლის 14 აგვისტოს ომმა შეცვალა ხურცილავების ოჯახის მშვიდობიანი ცხოვრება. ამირანი მეგობრებთან ერთად სამშობლოს დამცველთა რიგებში ჩადგა.
1992 წლის 20 სექტემბრიდან ამირან ხურცილავა ირიცხებოდა საქართველოს რესპუბლიკის თავდაცვის სამინისტროს მე-2 საარმიო კორპუსის 23-ე მექანიზირებული ბრიგადის მე-6 სატანკო ბატალიონის პირველ ასეულში რიგით მებრძოლად.იგი თანამებრძოლებთან ერთად ვაჟკაცურად იგერიებდა მტრის შემოტევებს ბატალიონის დისლოკაციის ადგილზე-სოფელ ქვემო ეშერასთან.საბედისწერო აღმოჩნდა მისთვის 1993 წლის 4 ივლისი. დილის 02:00 საათზე საარტილერიო დაბომბვის ხმამ შეძრა სოხუმი,მტერმა მორიგი შეტევა დაიწყო ქალაქზე. ამირანი მე-6 ბატალიონის პირველი ასეულის მეომრებთან ერთად ჩაერთო მტრის სადაზვერვო ჯგუფთან უთანასწორო ბრძოლაში და გმირულად დაიღუპა ბრძოლის ველზე.
საქართველოს პრეზიდენტის განკარგულებით სამშობლოს ტერიტორიული მთლიანობისთვის ბრძოლაში გამოჩენილი გმირობის, ვაჟკაცობისა და თავგანწირვისათვის ამირან ხურცილავა,სიკვდილის შემდეგ, დაჯილდოვდა ვახტანგ გორგასლის III ხარისხის ორდენით.
