რომან კაჭარავა შალვას ძე დაიბადა 1949 წლის 15 იანვარს, აბაშის რაიონში. საცხოვრებლად გადავიდა ქ. გაგრაში, შექმნა ოჯახი.
რომანი იყო ბუნებრივი ნიჭით დაჯილდოვებული, საოცრად უშიშარი და გაუტეხელი, ყველაფერში პირველობა სურდა. განსაკუთრებით სახიფათო საქმებში არ გაუშვებდა წინ არავის. ჰქონდა დიდი იუმორის გრძნობა, ძლიერ უყვარდა შვილები.
სძულდა ორპირობა და სიცრუე. სამშობლოს სიყვარულისათვის ყოველგვარი პირველი გასწირა და უყოყმანოდ ჩაეწერა მოხალისეთა რიგებში.
“აფხაზს მე პირველი არ ვესვრი, უცხო გადამთიელს კი არ დავინდობ“, - ამბობდა ომში წასვლის წინ.
რომან კაჭარავა, 1992 წლის 18 აგვისტოდან #1687 ბრძანებით ჩაირიცხა თავდაცვის სამინისტროს გაგრის მე-2 ბატალიონში რიგით მებრძოლად.
ბატალიონთან ერთად მონაწილეობდა ყველა საბრძოლო ოპერაციებში. იყო დისციპლინირებული და შემსრულებელი ჯარისკაცი, მეთაურის ბრძანებებს და დავალებებს ასრულებდა დროულად და პირნათლად.
თავგამეტებით იბრძოდა კოლხიდასთან, ვიდრე უცხოტომლებმა ზურგიდან არ შემოუარეს დიდი ძალებით. 1992 წლის 2 ოქტომბერს ქ. გაგრაში გმირულად უგზო-უკვლოდ დაიკარგა.
წინ ცხოვრების დიდი და ლამაზი გზა ესახებოდა. ისიც იცოდა, სიკვდილის გზით მიდიოდა, მაგრამ ასე ახლოს თუ იყო სიკვდილი ჩასაფრებული, ვინ მოიფიქრებდა!
ვაჟკაცებად არ იბადებიან, ვაჟკაცებად კვდებიან. მათ სახელს სამშობლო სანთლებად აინთებს. მან დიდი სახელი დატოვა, სამშობლოსათვის თავდადებული მამულიშვილის სახელი.
მარინა ნაჭყებია დ.1956წ. აფხაზეთის მებრძოლთა მკვლევარი დ. სოხუმი აფხაზეთი