აბაშიძე ანტონი (როსტომი) (1743 – 12.04. 1821, რაჭა, სხვავის მონასტერი), სასულიერო მოღვაწე, იღუმენი.
ანტონი - აბაშიძე როსტომი - (1743 – 12.04. 1821, რაჭა, სხვავის მონასტერი), სასულიერო მოღვაწე, იღუმენი.
დაიბადა იმერელი თავადის ოჯახში. XVIII ს. 60-იან წწ. როსტომი ქუთაისის ყოვლადწმინდა ღვთისმშობლის მიძინების საკათედრო ტაძარში ანტონის სახელით ბერად აღკვეცეს. მალევე დიაკვნად აკურთხეს. XVIII ს. 70-იან წწ. მღვდლად აკურთხეს. 1784 წ. ოქტომბერში იმერეთის მეფე დავით გიორგის ძემ რუსეთში ელჩობა გაგზავნა, რომელსაც დასავლეთ საქართველოს კათოლიკოსი, ანტონის ძმა, მაქსიმე (აბაშიძე) მეთაურობდა. დელეგაციაში სხვა წევრებთან ერთად მისი უმცროსი ძმა, ანტონიც შედიოდა, რომელიც იმ პერიოდში იღუმენის წოდებით გელათის მონასტრის წმ. გიორგის ტაძარში მსახურობდა. მთელი ელჩობის პერიოდი მან თავის ძმასთან ერთად გაატარა. კიევში კათოლიკოს მაქსიმეს გარდაცვალების შემდეგ (1795) ანტონი საქართველოში დაბრუნდა და სოფელ სხვავის წმ. იოანე ნათლისმცემლის მამათა მონასტრის წინამძღვრად დაინიშნა. 1815 წ. 15 მარტის მონაცემებით, სხვავის მონასტრის წინამძღვარი უკვე არქიმანდრიტი პანტელეიმონია. იღუმენი ანტონი კი, როგორც მონასტრის რიგითი წევრი, ცხოვრობს ამავე მონასტერში. საქართველო-იმერეთის სინოდალურმა კანტორამ მას დაუნიშნა პენსია – 60 მანეთი ვერცხლი წელიწადში. გარდაიცვალა 78 წლის ასაკში.
