დაბადების ადგილი: ქ. თბილისი

დაამთავრა თბილისის სახელმწიფო სამხატვრო აკადემიის ფერწერისა და თეატრალურ-დეკორატიული ხელოვნების ფაკულტეტები 1967 წელს, ასპირანტურა 1972 წელს.

აკადემიის დამთავრების შემდეგ მუშაობდა, როგორც თეატრისა და კინოს მხატვარი. სპექტაკლებისა და ფილმების გაფორმებისთვის იგი არაერთ ფესტივალზე დაჯილდოვდა. მისი შემოქმედება გამოირჩევა მრავალფეროვნებით: ფერწერა, გრაფიკა, კოლაჟი, კინო, თეატრი, წიგნის გრაფიკა. მოღვაწეობის პერიოდში აქვს გამართული მრავალი პერსონალური და ჯგუფური გამოფენა, როგორც საქართველოში, ასევე მის ფარგლებს გარეთ. პერსონალური გამოფენები: გალერეა "ვერნისაჟი", თბილისი, საქართველო (2010); საქართველოს საელჩო ლონდონში, დიდი ბრიტანეთი (2009); ბადრაპენაუ, გერმანია (2008); გალერეა "კოპალა", თბილისი, საქართველო (2007); საქართველოს ხელოვნების სახელმწიფო მუზეუმი (2002); გალერეა "ვერნისაჟი", თბილისი, საქართველო (2001); გალერეა "ვერნისაჟი", თბილისი, საქართველო (2000); ცენტრალური მხატვრის სახლი, მოსკოვი, რუსეთი (1997); საქართველოს ხელოვნების სახელმწიფო მუზეუმი; (1997); პარიზი, საფრანგეთი (1995); მოსკოვის ლიტერატორთა სახლი, რუსეთი (1990); მხატვრის სახლი, თბილისი, საქართველო (1988); ცენტრალური მხატვრის სახლი, მოსკოვი, რუსეთი (1988); მოსკოვის ლიტერატორთა სახლი, რუსეთი (1976).  ძირითადი ჯგუფური გამოფენები: "ტროტუარების მემუარები", გალერეა "ვერნისაჟი", თბილისი, საქართველო (2010); ავანგარდისტთა გამოფენა, გალერეა "ვერნისაჟი", თბილისი, საქართველო (2005); თანამედროვე ხელოვნების გალერეა, თბილისი, საქართველო (2004); საქართველოს სახელმწიფო ხელოვნების მუზეუმი (2002); გალერეა "უნივერსი", თბილისი, საქართველო (2002); ცენტრალური მხატვრის სახლი, მოსკოვი, რუსეთი (1999); "Moscow Riding-Hall", მოსკოვი, რუსეთი (1998); თანამედროვე ხელოვნების საერთაშორისო ბიენალე იუნესკოს ეგიდით, თბილისი, საქართველო (1996); გამოფენა-გაყიდვა, Drouot Richelieu, maison de vente, პარიზი, საფრანგეთი (1995); "Brock Gallery", ბარსელონა, ესპანეთი (1991); გამოფენა-გაყიდვა, კინოს სახლი, თბილისი, საქართველო (1991); დუსელდორფი, გერმანია (1989); მონრეალი, კანადა (1998); საგნობრივი ხელოვნების გამოფენა, მხატვრის სახლი, თბილისი, საქართველო (1989). მხატვარ დავით კაკაბაძის შვილი.

წყარო: ვინ ვინ არის საქართველოში: ქართული ბიოგრაფიული ცნობარი. –  თბ., 2006.-გვ.233; artinfo.ge

• საქართველოს დამსახურებული მხატვარი

კაკაბაძე 

ამ გვარის ფუძედ ზოგი კაკაბას მიიჩნევს და ფრინველს უკავშირებს, კერძოდ, კაკაბს. ვფიქრობ, ეს გულუბრყვილო ეტიმოლოგიაა. 

გვარის ფუძეა მამაკაცის საკუთარი სახელი კაკა, რომელსაც თან ერთვის სუფიქსები ბა და ძე. 

კაკა – ჩხარის ციხის მეციხოვნე, მოიხსენიება მეჩვიდმეტე საუკუნეში. 

კაკაბაძე ერთ-ერთი უძველესი და ლიბოძლიერი გვარია. გვარი გვხვდება 1545 წლიდან. 

„კაკაბაძე, კურსევს მცხოვრები, ბაგრატ მეფემ მისი შეწირულსა განუახლა გელათის წმიდა გიორგის“ (1545 წელი). 

კაკაბაძეები მოიხსენიებიან 1561-1612 წლებში ქვემო ქართლში, 1621 წელს – ხონში, 1583 წელს – ფიმში. ასევე, კაკაბაძეები მეცხრამეტე საუკუნეში ცხოვრობდნენ აჭარაშიც, კერძოდ კი, ქედის რაიონის სოფელ ორიცვაში. აქ ცნობილი იყო 1895 წელს მღვდელი კაკაბაძე, დიდი მქადაგებელი, მოყვარე და პატივმცემელი ქართველთა. თურმე, ის არ უშინდებოდა მუქარას. ეკლესიაში ზარებს რეკდა და რამდენიმე სოფლის ხალხს ამით წირვაზე იხმობდა. წინ აღდგომია ჯამეს აგებას, მაგრამ თავისი არ გასვლია. მან ჩაქვისკენ გაქცევით უშველა თავს, რადგან იქ ისლამი ისე ძლიერად არ იყო. იმ პატრიოტი მღვდლის, კაკაბაძის შვილები მომხვდურებმა ქეშიშოღლებად მონათლეს, ანუ „ურჩი მღვდლის შვილები“. გადმოცემის თანახმად, დევნის თავიდან ასაცილებლად, მღვდელს დედის თუ ახლო ნათესავის გვარი კეკიძე – გეგიძე მიუღია. ემსახურებოდა ჩაქვი-მახინჯაურის ზონის, ჯერ კიდევ, ქრისტიანად დარჩენილ მოსახლეობას. 

მარადიდის უბან ქუთურეთში არიან კეკიძეები – ასე მონათლეს მღვდელ კაკაბაძის შთამომავლები. დაბა ქედის გარეუბანში კი არის სოფელი კაკაბაძეები, აქვეა ნაცოხვარი ამავე სახელწოდებით. 

კაკაბაძეები, კეკიძეები და გეგიძეები ცხოვრობენ სხვა ადგილებშიც. ისინი დამოუკიდებლად გაჩენილი გვარებია. 

გეგიძეები აზნაურებიც იყვნენ. 

იმ კაკაბაძეებმა კი, რომლებიც აჭარაში ცხოვრობდნენ, აწარმოეს გვარი კეკიძე და გეგიძე. 

საქართველოში ყველაზე გავრცელებულ 1 000 გვარს შორის, კაკაბაძეებს რაოდენობის მიხედვით 169-ე ადგილი უჭირავთ. 

საქართველოში 3 444 კაკაბაძე ცხოვრობს. თბილისში – 868, ხონში – 575, ხელვაჩაურში – 422, არიან სხვაგანაც.