გოჩა კვანტალიანი დაიბადა 1971 წლის 31 აგვისტოს , ქალაქ სოხუმში. დაამთავრა სოხუმის მე-7 საშუალო სკოლა. სწავლობდა სოხუმის უნივერსიტეტის ფაკულტეტზე.
1992 წლის 1 ნოემბრიდან გოჩა კვანტალიანი მსახურობდა საქართველოს რესპუბლიკის თავდაცვის სამინისტროს მე-2 საარმიო კორპუსის 23-ე მექანიზირებული ბრიგადის მე-2 ბატალიონში,შემდეგ მე-8 ბატალიონის პირველ ასეულში რიგით მეომრად.
21 წლის ვაჟკაცმა თავიდანვე შეაყვარა თავი, როგორც მეთაურებს,ასევე თანამებრძოლებს. განსაკუთრებული თვისებებით გამორჩეულმა ბიჭმა ყველას პატივისცემა და სიყვარული დაიმსახურა. გოჩა კვანტალიანი აქტიურად მონაწილეობდა ასეულის მიერ წარმოებულ საბრძოლო ოპერაციებში შრომა-ცუგუროვკის მიმართულებით,პირნათლად ასრულებდა საბრძოლო დავალებებს.
1993 წლის სექტემბერში, როცა სოხუმში მოჩვენებითი მშვიდობა დამყარდა და ქალებითა და ბავშვებით აივსო ქალაქი, როცა ახალგაზრდები სასწავლო წლის დაწყებისთვის ემზადებოდნენ, გოჩას ფორმა არ გაუხდია.მოუსვენრად იყო, თითქოს რაღაც საშინელების მოახლოებას გრძნობდა.
1993 წლის 16 სექტემბერს,გამთენიისას,იგი შტაბში მორიგეობდა, როდესაც მტერმა კვლავ დაარღვია ხელშუკრულება და ვერაგულად დაესხა თავს მშვიდობიან უიარაღო მოსახლეობას.გოჩა თავისი განუშორებელი ტყვიამფრქვევით ერთ-ერთი პირველი ეკვეთა მომხვდურთ და თავისი თავგანწირვით სოფლების- თავისუფლების, იაშთუხის,ბირცხის - ასეულობით უმწეოდ დარჩენილი ქალის,ბავშვისა და მოხუცის სიცოცხლე იხსნა. 17 სექტემბერს, როდესაც ყოველი მხრიდან, ყველა საშუალებით (არტილერიით,ტანკებით-ზღვიდან, ჰაერიდან) შემოუტია მტერმა ჩვენს პოზიციებს, გოჩა ბოლო წუთამდე თავდაუზოგავად იბრძოდა. ალყაში მოქცევის შემდეგ იგი უგზო-უკვლოდ დაიკარგა.
გოჩას დედა ქალბატონი ნათელა იხსენებს შვილის ბოლო სიტყვას - „დედი,იცოდე,სოხუმი თუ დაეცემა, არ გეგონოს, რომ მე ცოცხალი გავალ აქედან“! იმედია, საქართველო გაერთიანდება... დაბრუნებული აფხაზეთი და ოსეთი საქართველოს ტერიტორიული მთლიანობისთვის დაღუპული,მარად ჭაბუკებად დარჩენილი,ჩვენი ბიჭების ყველაზე დიდი ჯილდო იქნება...
საქართველოს პრეზიდენტის განკარგულებით სამშობლოს ტერიტორიული მთლიანობისთვის ბრძოლაში გამოჩენილი გმირობის, ვაჟკაცობისა და თავგანწირვისთვის გოჩა კვანტალიანი, სიკვდილის შემდეგ, დაჯილდოვდა ვახტანგ გორგასლის I ხარისხის ორდენით.