მე-2 საარმიო კორპუსი 23-ე ბრიგადა მე-6 ბატალიონი წიგნიდან "საქართველოსთვის"
ზურაბ პართენის ძე ფოფხაძე დაიბადა 1958 წლის 8 მარტს ქალაქ ამბროლაურში.
სკოლის დამთავრების შემდეგ სწავლა განაგრძო ქალაქ რუსთავში მეტალურგიულ სასწავლებელში. პარალელურად უკრავდა მუსიკალურ ანსამბლში. 1978 წელს დაოჯახდა,შეეძინათ ქალ-ვაჟი. 1982 წელს ოჯახი საცხოვრებლად გადავიდა გულრიფშის რაიონში და მზიურ აფხაზეთში შეუდგნენ ბავშვების აღზრდასა და მომავალზე ზრუნვას.
1992 წლის 14 აგვისტოს აფხაზეთში დაწყებულმა ომმა სამშობლოსთვის გულანთებული ვაჟკაცის გეგმები ძირფესვიანად შეცვალა, გვერდზე არ გამდგარა ქვეყნის გასაჭირის დროს, იარაღით ხელში დადგა სამშობლოს დამცველთა გვერდით. 1992 წლის სექტემბრიდან ზური ირიცხებოდა საქართველოს რესპუბლიკის თავდაცვის სამინისტროს მე-2 საარმიო კორპუსის 23-ე მექანიზირებული ბრიგადის მე-6 სატანკო ბატალიონის მე-3 ასეულში.
აფხაზეთში მიმდინარე საომარი მოქმედებების დროს ზურაბ ფოფხაძემ თავი გამოიჩინა,როგორც საქართველოს ერთიანობისთვის თავდადებულმა მებრძოლმა. ერთ-ერთი შემოტევის მოგერიების დროს დაიჭრა, გამოჯანმრთელების შემდეგ კვლავ დადგა თანამებრძოლების გვერდით. აქტიურად მონაწილეობდა ბატალიონის მიერ ჩატარებულ ყველა საბრძოლო ოპერაციაში,პირნათლად ასრულებდა მეთაურის დავალებებს. თანამებრძოლებს შორის სარგებლობდა კარგი ავტორიტეტით.
აფხაზეთის დაცემის შემდეგ ზურაბ ფოფხაძემ გააგრძელა სამსახური შინაგან საქმეთა სამინისტროს აფხაზეთის შსს სპეცდანიშნულების ასეულში. 1997 წლის ივლისში ზურაბ ფოფხაძე გმირულად დაიღუპა გულრიფშის რაიონში- ერთ-ერთი საბრძოლო დავალების შესრულებისას.
საქართველოს პრეზიდენტის განკარგულებით სამშობლოს ტერიტორიული მთლიანობისთვის ბრძოლაში გამოჩენილი გმირობის, ვაჟკაცობისა და თავგანწირვისათვის ზურაბ ფოფხაძე,სიკვდილის შემდეგ , დაჯილდოვდა ვახტანგ გორგასლის II ხარისხის ორდენით.