მე-2 საარმიო კორპუსი 23-ე ბრიგადა მე-8 ბატალიონი წიგნიდან "საქართველოსთვის"
უფროსი ლეიტენანტი ნუგზარ ნიკოლოზის ძე კოპალიანი დაიბადა 1960 წლის 22 ოქტომბერს, გულრიფშის რაიონის სოფელ ყადაში. დაამთავრა ბესლეთის საშუალო სკოლა. სამხედრო-სავალდებულო სამსახურის მოხდის შემდეგ მიიღო განათლება სოხუმის ინდუსტრიულ ტექნიკუმში.მუშაობდა სოხუმის შემოვლითი გზის მშენებლობაზე - სამთო-აფეთქებით სამუშაოებზე.
1992 წლის ოქტომბრიდან, ნუგზარ კოპალიანი ირიცხებოდა საქართველოს რესპუბლიკის თავდაცვის სამინისტროს მე-2 საარმიო კორპუსის 23-ე ბრიგადის კავშირგაბმულობის ბატალიონში,(შემდგომ გარდაიქმნა მე-8 ბატალიონად). იყო მე-4 ასეულის მე-3 ოცეულის მეთაური. ებარა ასეულის ნაღმტყორცთა ბატარეა. იბრძოდა მდინარე გუმისთის პოზიციებზე,სოფელ შრომაში და ცუგუროვკის მაღლობზე,დაჭრილსაც კი არ მიუტოვებია პოზიციები. თავისი საბრძოლო საქმიანობიდან გამომდინარე , ნაღმის გაშვების გათვლის საოცარი სიზუსტის,აკურატულად საქმის ბოლომდე მიყვანისაა და ამავე დროს ტყის მოხდენილ ფრინველთან უცნაური მსგავსების გამო მეომრებმა ზედმეტსახელად „კოდალა“ შეარქვეს, მოწინააღმდეგეც კი ამ სახელით მიმართავდა რაციით მოლაპარაკების დროს.
1993 წლის სექტემბერში,სოხუმზე განხორციელებული მორიგი თავდასხმის პირველ დღეს,ბირცხის მთაზე შემოღწეული მტრის განსადევნად,სოფელ ბესლეთის მკვიდრთა პირველი ჯგუფის წარუმატებლობის შემდეგ, მან ხელმეორედ შეკრიბა რაზმი სოფლის მოხალისეებისგან.დაგეგმა ოპერაცია ძველი პოზიციების აღსადგენად და 120 მმ ნაღმტყორცნებით სოხუმის შემოვლითი გზის ჩრდილოეთიდან ჩასაკეტად. ეს ოპერაცია დაგვიანებული აღმოჩნდა - მტერმა ბირცხა დაიკავა. პოზიციებმდე არმისულ რაზმს ჩასაფრებული მოწინააღმდეგე თავს დაესხა და 20 სექტემბერს ნუგზარ კოპალიანი უთანასწორო ბრძოლაში დაიღუპა. მადლიერმა მეომრებმა,ბრძოლის ველზე არ დატოვეს მეგობრის ცხედარი,ღამით ჩამოიტანეს მთიდან.
ნუგზარ კოპალიანი დაკრძალულია სოფელ ბესლეთში,საკუთარ ეზოში.
საქართველოს პრეზიდენტის განკარგულებით სამშობლოს ტერიტორიული მთლიანობისთვის ბრძოლაში გამოჩენილი გმირობის, ვაჟკაცობისა და თავგანწირვისათვის ნუგზარ კოპალიანი, სიკვდილის შემდეგ, დაჯილდოვდა ღირსების ორდენითა და მედლით „მხედრული მამაცობისთვის“.
