იგორ პანტელეიმონის ძე გიორგაძე (დ. 23 ივნისი, 1950, ზაისანი, ყაზახეთი) — ქართველი პოლიტიკოსი, საქართველოს სახელმწიფო უშიშროების მინისტრი (1993-1995); უშიშროების გენერალ-ლეიტენანტი (1994). 1995 წლიდან ბრალდებულია ტერორიზმში. 1995–2016 წლებში იძებნებოდა ინტერპოლის მიერ.დაბადების ადგილი: ქ. ზაისანი, ყაზახეთი.
დაიბადა სსრკ-სა და ჩინეთის საზღვარზე მესაზღვრის ოჯახში. დაამთავრა საშუალო სკოლა 1967 წელს; მიიღო მუსიკალური განათლება ვიოლინოს განხრით; სიყმაწვილეში აქტიურად მისდევდა სპორტის მრავალ სახეობას (ფეხბურთი, კალათბურთი, ხელბურთი); დაამთავრა სახელმწიფო უშიშროების კომიტეტის (სუკ-ი) უმაღლესი სკოლა მოსკოვში 1973 წელს.
1973-1995წწ. რესპუბლიკის უშიშროების სამსახურში სხვადასხვა თანამდებობებზე მუშაობდა; 1980-1981წწ. მონაწილეობდა სსრკ სუკ-ის სპეციალური დანიშნულების რაზმ "კასკადის" საბრძოლო ოპერაციებში ყანდაარში, ავღანეთში; 1991-1992 წწ. სამოქალაქო ომში მონაწილეობდა ზვიად გამსახურდიას მოწინააღმდეგეთა მხარეს; 1993-1995წწ. იყო საქართველოს რესპუბლიკის უშიშროების მინისტრი; 1995 წელს პრეზიდენტ ედუარდ შევარდნაძეზე განხორციელებული თავდასხმის შემდეგ მან ქვეყანა დატოვა; იმავე წლის ოქტომბერში გამოქვეყნებული ღია წერილის შემდეგ იგი ფაქტობრივად გადავიდა ღია კონფრონტაციაზე; საქართველოს გენერალური პროკურატურის შუამდგომლობის საფუძველზე, 1995 წლის 20 ნოემბერს ინტერპოლის წითელი ცირკულარით იგორ გიორგაძეზე ძებნა გამოცხადდა. ძებნაში ყოფნისას გიორგაძემ დააფუძნა პარტია "სამართლიანობა" და ორგანიზაცია "ანტისოროსი". მიღებული აქვს 15 სახელმწიფო ჯილდო, მათ შორის მედალი "საბრძოლო მიღწევებისათვის".
წყარო: საქართველო:ენციკლოპედია., ტ. 2. - თბ., 2012 . -გვ.14
მადლობა გალაქტიონ (გოგიტა) თემურის ძე გიორგაძეს, მცხოვრები სოფ. გორმაღალი, სამტრედია
